Mizoram basketball tan bung thar duhawm

Mizoram mipa basketball team-in hmarchhak state aṭanga 71st Senior National Basketball Championships - North East Zone hmachhawn zawng zawng an hneh fai vek a, NorthEast champion an ni.

Mizoram basketball tan bung thar duhawm a ni a, zan khat thil thua thleng ni loin awmze neia zawi zawia hmasawnna rah a tih theih. Hlawhtlinna phenah hian Mizoram Basektball Association (MBBA), Mizoram sorkar leh Zonet ten tha an thawh hlawk hle.

MSL rah chhuah
Tun hma chuan senior level chinah Mizoram basketball team-in result ṭha an hlawh ngai meuh lo a, mimal erawh chuan H. Laldinsanga'n (Mapuia) thui tak a thleng. Saron Veng tlangval Mapuia hian India aiawha khelin ram tan silver medal a la tawh a, India junior team coach zingah telin gold a lakpui tawh bawk.

Amaherawhchu Mizoram team erawh state dang basketball thiam an elpha lo tih chu zep rual a ni lo. MSL hmasa ber MVP Mapuia chuan, "Tun hma kha chuan zone anga kalpui a ni lo a, India ram pum inelna a ni nghal. Zep thu a cheng lo a, state dang ṭha ho kha chu kan tluk lo deuh a ni," tiin Vanglaini a hrilh.

Kum 2007 khan Pondicherry-a inelna neih ṭumin Mizoram team-in a vawi khat nan Senior National Championship an khel a, a tikimtu chauh a ni. MSL champion Khatla TBL, Mission Vikings leh Zarkawt BCA te pawhin Mizoram ai zuk awh mah se result ṭha an nei chuang lo.

Mapuia chuan, "MBBA leh Zonet zarah league ṭha tak MSL kan nei a, player-ten nasa takin hma an sawn phah. Mizoram sorkar hmalaknain court ṭha zawk leh gym ṭha zawk te kan nei a, a rah sengtu chu Mizoram basektball a ni.

"Tun hma chuan player-ten Mizoram tana khelh an tum. Tunah erawh MSL khelh an tum a, chumi aṭang chuan Mizoram tana khel tur an thlang chauh. Player-ten kum tluanin training an nei a, tun hma aiin an sang ṭha tawh bawk. Mizoram basketball-in hma kan sawn tih a chiang a, hun rei tak North East basketball kan thunun theih ka ring," tiin Vanglaini a hrilh.

Mizoram team chu
Mizoramin Mapuia hnung zuitu a nei ta a, Tuikhuahtlang tlangval Lalrina Renthlei-in India kawr a rawn ha ve ta. SABA Championship-ah Lalrina hian India a champion pui a, tawnhriat neih ṭhat belh sawtin Mizoram tan captain hna a rawn chelh.

Lalrina hming a langsar a, chutihrualin player dang zawng pawh an rintlak vek. Mizo player-te pawh an sang ṭha a, feet ruk tling lo mi pathumte pawh 5ft 11in vel vek an ni.

Player 12-te hi MSL club pali Zarkawt BCA (4), Khatla TBL (3), Tuikual South (3) leh Mission Veng Hotshots (2) te aṭanga lakkhawm an ni a, champion-na kawngah MSL a pawimawh tih a chiang.

MSL han tih hian inelna buatsaihtu MBBA leh Zonet te bakah club neitu leh sponsor-tute thawhrimna hmuh hmaih a thiang lo. Mizoram vice captain F. Zodinthara chuan, "MBBA leh Zonet ten MSL an siam vang liau liau ka lo ti thei lo. Kan han champion chiah khan Zonet lam pawh ka be pawp a, lawmthu ka han sawi nghal. Amaherawhchu final round khel tur kan la ni a, hmabak kan la ngah a ni," tiin Vanglaini a hrilh.

Tuikual South tlangval Dina hi 2007 khan Mizoram aiawhin Lalrina leh Faksanga te nen Pondicherry-ah an zin tawh. Kum 2010 khan Shillong-a neih NorthEast Games-ah final lutin Assam an hneh lo a, Mizoram basketball hrechiangtu zinga mi a ni.

MSL leh a chhehvel
MBBA president Dr Lalrinawma Hnamte chuan, "A bul berah chuan MSL a ni. Zonet-in kan player-te an promote a, MSL Club-ten sum tam tak sengin club an enkawl a, phai lam aṭangin player ṭha an lalut. Mizo player-ten MSL hmangin phai lam player an el thei tih an hria a, inrintawkna nasa tak an neih phah a ni," tiin Vanglaini a hrilh.

MBBA President chuan sawi chhun-zawmin, "Hmarchhakah hi chuan Assam hi an ṭha ber ṭhin a, Assam ngawr ngawr hi an ṭha lam ni loin Services leh Railways player te an chhawr theih avangin tluk an har. Tunah erawh chuan kan hneh ta," tiin a sawi a, Mizoram team sponsor-tu leh Shillong-a Mizoram ṭawmawmtute chungah lawmthu a sawi bawk.

MSL awm hnua basketball-in hlawhtlinnna a nei hi Zonet tan chanchin lawmawm a ni a, basketball hmain football-ah hlawhtlinna ropui tak an chang tawh bawk. Mizoram Football Association leh Zonet-in Mizoram Premier League an buatsaih hnuah Mizoram team-in Santosh Trophy leh National Games-ah an champion a, Aizawl FC-in I League nomawi an chawi bawk.

Zonet director LV Lalthantluanga chuan, "Mizoram basketball-in hlawhtlinna an chang hi kan lawm hle. Mizoram Super League leh Mizoram Premier League kan buatsaih chhan a hlawhtlingah kan ngai," tiin Vanglaini a hrilh ve bawk.