Covid-19 vanga buai Chelsea an chelh
Pathianni zan khan Molineux Stadium-ah Chelsea an lenglut a, Wolverhampton Wanderers nen 0-0 in an inhnehtawk. Blues hian match hnuhnung pahnihah point hnih chauh an hlawhchhuah avangin hmahruaitu Manchester City chu point rukin an pha tawh lo.
Covid-19 nghawng
Chelsea hian Wolves lakah hian Covid-19 vangin Romelu Lukaku, Timo Werner, Jorginho, Kai Havertz leh Callum Hudson-Odoi te an chhawr thei lo a, inkhelh hun sawn dil hial mah se phalsak an ni lo.
Blues hian bench-ah player paruk chauh an dah thei a, chung zinga pahnih chu goalkeeper an nih avangin outfield player pali chauh an awm. Chutihrualin Chelsea hi chak tura rinkai tho an la ni.
A nung tawk lo
Chelsea an ṭhat dan berin an inrem thei lo a, an inkhel pawh a nung tawk lo. Minute 15-naah Wolves-in counter attack hmangin an nawr let a, Leander Dendoncker ball pek chu vei lam aṭangin Fernando Marcal-a'n a cross lut a, Daniel Podence-a'n a khung.
Wolves-in goal khung an lawm a, mahse VAR hmanga enlet hnuah offside vangin pawm a ni lo. Chelsea-in ball inpe kual nasa nachungin a hmawr an bawk thei lo a, goal hmaah Wolves bawk an hlauhawm. Dendoncker-a'n hnai tak aṭangin a tauh goal lo.
Second half-ah Chelsea an insiamṭha hret a, chance ṭha bik erawh insiam an harsat. Minute 79-naah Christian Pulisic-a'n ṭha taka lalutin goal-ah pet mah se keeper José Sa-a'n a dang. Inkhel nung tawk loah goal a lut lo a, Chelsea point khatah an lungawi a ṭul.
Tuchel a thinur
Covid-19 in Chelsea run avangin inkhelh hun sawn an dil a, phalsak erawh an ni lo. Thomas Tuchel-a chuan, "Player himna te, kan him tlan dan turte kan ngaihtuah a, mahse kan chet dan hi a him lo. Covid-19 test kan nei leh ang a, positive an awm belh pawhin mak ka ti lo ang. Bus-ah kan chuang ho a, chaw kan ei ho a, engmah thleng lo ang maiin kan awm ho a ni," tiin khelh luihtir an nih chu a lungawi loh thu a sawi.
Chelsea hian Covid-19 kai bakah player inhliam Andreas Christensen te squad-ah an dah lo a, Thomas Tuchel-a'n Under 23 player-te squad-ah a dah duh loh avangin player chhawr tur an tlem phah. U23 player-te hi a hrana inkhung a nih avangin German manager hian senior player-te nena awm ho a remti lo a ni.