Krismas laia hmahruaitu City

Manchester City chuan Pathianni zan khan Newcastle United 4-0 in an sawp a, match 18 aṭanga point 44 hmuin Krismas laia Premier League hmahruaitu an ni dawn.

Premier League-ah Man City hian ṭum hnih chiah Krismas laiin hma an la hruai a, 2011-12 leh 2017-18 season kha niin an champion zui ve ve. St James' Park-a inkhelah hian mikhual team tan Ruben Dias (5'), Joao Cancelo (27'), Riyad Mahrez (64') leh Raheem Sterling (86') ten goal khat ṭheuh an khung.

Man City manager Pep Guardiola chuan, "First half kha tun season-a kan khelh chhiat ber ṭumah ka ngai. Kan theihna angin kan khel chhuak lo a, ball kan khawih tam hret vek a, ball kan hloh nasa bawk. Kan vannei a, Newcastle tlarhnung a phui ṭha lo bawk," tiin a sawi.