La Liga hmahruaitu Real-in goal an khung lo

Real Madrid chuan Pathianni zan khan Santiago Bernabeu-ah Cádiz an mikhual a, Spanish La Liga aṭanga tla thei dinhmuna ding mek team lakah goal an khung thei lo.

Real Madrid leh Cadiz hi 0-0 in an inhnehtawk a, league match riat chhung a zawna chak an tumna chu table-a 18-na Cadiz-in an tihtawpsak.

Carlo Ancelotti nauten hnehna chang zo lo mah se league-ah erawh hma an hruai chhunzawm zel a, match 18 an khelh aṭangin point 43 ngawt an nei tawh.

Real hnuai chiahah point 37 hmuin Sevilla an awm a, match khata khel tlem chungin Madrid khaw club hi point rukin an thlau - zanin dar 2:00-ah Xavi hoa insiamṭhat tum Barcelona an mikhual zui ang.

Hazard a lo kir
Cristiano Ronaldo hmun ruak zau tak hnawhkhat tura an beisei kha a ni a, mahse, Eden Hazard-a'n Spain-ah a thiam thil a theihnghilh ta emaw tih mai turin hun a hmang a, a inhliam ve reng bawk!

Hazard-a'n Chelsea a chhuahsan hma season, 2018-19 ah khan inelna hrang hrangah match 52 khelin goal 21 a khung a, assist vawi 17 a nei - Real-in a man atana pound maktaduai 150 an theh chhuak ngam kha a mak lo.

Mahse, Real-ah erawh kan hriat ṭhin Hazard kha hmuh tur a awm ta lo a, season hnih leh a chanve chhungin match 56 chiah a khel a, goal nga a khung a, assist vawi kua a nei bawk.

Cadiz lakah September hnua a vawi khat nan Hazard hian inkhel bul a ṭan a, first half-ah hmuh tur awm mang lo mah se second half-ah erawh kan hmuh ṭhin Hazard kha hmuh tur a awm leh ṭan a, Real fans chuan harsatna awm loa a dam chhoh zel an beisei ang.

36 shots, 0 goal
Santiago Bernabeu-ah Real-in inkhel an thunun a, ball pawh 82% ngawt changin vawi 36 ngawt shot an nei bawk. Mahse, a pawimawh ber erawh goal a ni a, Real-in an khung theih miau loh avangin point an insem.

Brazilian forward Vinicius Junior-a'n Real tana a league match 100-na a khel a, mahse, kum 21 mi forward pawh a lansarh zan a ni lo a, goal nen La Liga century a siam hi a lawm thei lo.

Vinicius hian tun season inelna hrang hrangah match 24 khelin goal 12 a khung tawh a, assist vawi kua a nei bawk a, a professional career-a season khata goal a khung tam ber season a ni.

Mahse, Cadiz lakah mak takin Vinicius a langsar thei lo a, league match hnih chhungin goal a khung ta lo. Real tan mangan hluaina tur erawh a ni lo - point rukin an la sang fal tlat.

Khawiah nge Benzema?
Real tana tun season-a player langsar ber chu Karim Benzema a ni a, French striker hian inelna hrang hrangah match 22 khelin goal 18 a khung tawh a, assist vawi riat a nei bawk.

Mahse, Cadiz lakah Benzema a reh a, goal khung an mamawh zanah French striker hian a khung thei bik lo - Cadiz tan Alvaro Negredo chuan hun tawp dawnah chance duhawm a nei zawk a, khung ngat se Real an mualpho ang.

Manchester City striker hlui Negredo hi kum 36 mi a ni ve tawh a, tun season inelna hrang hrangah match 18 khelin goal nga a khung tawh a, assist vawi hnih a nei.

Real boss Ancelotti chuan, "Inkhel ṭantir aṭanga a tawp thleng khan kan theihna zawng zawng kan hlan. Mahse, goal bulah kan hriam tawk lo a, thinrim thei erawh ka ni lo. Hetiang ang match hi chu a thleng ve thei tih ka hria a, result tih loh thil dangah khan lawmna tur tam tak ka hmu a ni," tiin a sawi.