Blasters-in Mumbai an barakhaih!

Pathianni zan Indian Super League inkhelah Kerala Blasters chuan rin loh takin Mumbai City an hneh a, an hneh a ni satliah mai lo a, 3-0 in an sawp!

Team pahnih intawn hmain match rukah Mumbai-in chak loh vawi khat chiah an nei a, Kerala Blasters hi match ngaah vawi khat chiah an chak thung.

Mahse, Pathianni zanah football mawina phochhuah a ni a, rin hlawh lo zawk an chak - South Indian club tan hian Sahal Abdul Samad, Alvaro Vazquez leh Jorge Pereyra Díaz (penalty) ten goal khat ṭheuh an khung.

Argentine striker Jorge Pereyra Díaz hi minute 50-naah Mourtada Fall chuan hnung lam aṭangin a tlawh a, Mumbai City defender hi hnawhchhuah a nih bakah penalty a chawi bawk - Diaz chuan goal thumna turin a khung zui a, Mumbai tan thawhleh ngaihna a awm tawh lo.

Mumbai City tan Lalengmawia'n bul a ṭan a, mahse, Vaivakawn tlangval Apuia hian goal khung theihna remchang a neih chu a chhawr thei lo - Mumbai tan hian Ramhlun North tlangval Hmingthanmawia (Valpuia) chu bench aṭanga luhtir a ni bawk.

Blasters tan K. Lalṭhathanga'n bul a ṭan a, Bethlehem Vengthlang tlangvalin South Indian club-ah hmun pawimawh a chang chhunzawm zel.