Bulls lakah Lakers chak lo

Hripui leng vangin NBA match tam tak chu inkhelh hun sawn a ni hlawm a, nimin zingah pawh match thum chauh an khel. Nimin zing inkhel hmuhnawm bera chhal ngamah Chicago Bulls chuan Los Angeles Lakers lakah 115-110 in hnehna an chang.

United Center-a inkhelah DeMar DeRozan-a'n point 38 a nei, a point neih zinga 19 zet hi quarter hnuhnung bera a vawm luh niin an chak theihna chhan langsar ber a ni. Ani bakah hian Nikola Vucevic-a'n double-double (19 points & 13 rebounds) a nei bawk.

Lakers lam tana che ṭha ber chu ni dang ang bawkin LeBron James a ni. American star hian court chhungah minute 39 hun a hman chhungin point 31 a nei a, rebound vawi 14 la thei mah se chakpui nan a tawk zo lo.

NBA season kal laiah Lakers hi an che fuh rei hleithei lo, match 16 chu chak ve tawh mah se ṭum 15 ngawt an tlawm tawh. An chak loh hnem avangin an dinhmun pawh a sang thei lo; Western Conference table-ah pasarihna dinhmun an luah mek.

NBA Results
Los Angeles Lakers 110 - 115 Chicago Bulls
Dallas Mavericks 105 - 111 Minnesota Timberwolves
Charlotte Hornets 106 - 137 Phoenix Suns