San Siro-ah Napoli an chak

AC Milan chu Serie A thlasik chawlh an hman hma an match khelh hnuhnung ber dawtah an chak lo. Minute nga leka Elif Elmas goal khung hmangin Napoli chuan San Siro 1-0 in an luhchhuah.

Hun tawp dawnah Milan hian Franck Kessie hmangin si phurh sut niah an inngai, mahse rei tak VAR hmanga endik a nih hnuah 'offside' tia hnawlsak an ni; goal luh hmain Olivier Giroud chu a lo offside a ni.

Tun hnai an league match hnuhnung palia a vawi khat nan Napoli an chak a, point 39 hmuin table-ah pahnihna an ni. An chungah hian hmahruaitu leh champion lai ni bawk Inter Milan chauh an awm.

Inter Milan hian Inrinni zan khan Salernitana chu 5-0 in an lo sawp tawh. Nerazzurri hian match 18 aṭanga point 43 hmuin, hmahruaitu ni chungin Krismas an hmang dawn. Kumin chhungin Serie A hi match khat ṭheuh an khel leh ang, chumin hnuah thlasik chawlh an hmang dawn a ni.

Theihna a awm
Napoli coach Luciano Spalletti chuan team ṭha AC Milan an hneh theih avanga a lawm thu a sawi a, a bik takin tharum mai bakah skills nei ṭha an nih avangin inven a harsat thu a sawi. San Siro aṭanga point thum hlawh thei an nih avangin a lawm hi a mak lo.

Spalletti chuan, "Minute ngana lekah goal kan khung, a tir aṭangin theihtawp kan chhuah nghal tih a lantir. Goal kan neih hnuah pawh kan inthlahdah lo a, mahni goal venhim chauh ni loin a nawr dan pawh kan thiam chhunzawm.

"Zlatan Ibrahimovic chauh pawh ven a harsa, chumi hnuah Olivier Giroud a lo luh belh bawk. Player lian leh tha rum ngah pahnih ven kha chu awlsam lo tak a ni, mahse kan vanneih zan chu ni se la chuan 2-0 a chak thei tur kan ni," tiin a sawi.

Hmasawn a ngai
AC Milan coach Stefano Pioli chuan season hmasa anga an zuih leh mai a hlau a, a naute chuan an talent dawn ti pung se a duh thu a sawi. Theihtawp chhuah chung pawha goal khung an harsat tlat chuan a ti mangang.

Pioli chuan, "Tharum kan hmang hnem, kan tlan tamin theihtawp kan chhuah, kan taksa a la chau lo tih pawh a takin a lang. Mahse, season kal laia kan khelh ṭhat berte zinga miah kan chak zo tlat lo, hmasawn ngaihna lai chu a awm.

"A tir lama goal chhuah hi a pawi ṭhin, kan khingpuite an inven tlat tawh chuan hna a hautak tawh ṭhin a ni. A bik takin khingpuite goal hmaah tun aia hriam leh zual a ngai," tiin tlarhma lama a chhawrte a duhkhawp loh thu a sawi.