Lammualah Electric Veng an êng ; MPL club tharin I League club Aizawl FC an hneh

Electric Vengin MPL club an nih hnua an match hmasa berah North East club zinga I League champion tawh awm chhun Aizawl FC chu 2-1 in an hneh.

Zirtawp zana Lammual a inkhelah Electric Veng tan Isak Vanlalpeka leh Vanlalhmangaiha ten first half-ah goal an khung a, Aizawl FC-in minute nga a la awmin Lalkhawpuimawia (Mapuia) hmangin goal khat chhanglet mah se I League club an tho chhuak thei lo.

MPL club thar Electric Veng hian naktuk tlai dar 2:00 hian Chanmari FC nen derby match an khel dawn a, point thum hmu tawh team pahnih inkhel hi a hmuhnawm ang.

Group A inkhel dangah Bethlehem Vengthlang FC leh Ramhlun North te zan dar 7:00-ah an in hmachhawn dawn a, Aizawl FC an awl thung ang.

Bul ṭan dan duhawm
Aizawl FC hi hmar chhak club zinga AFC Champions League Playoff leh AFC Cup khel hmasa ber a awm chhun an ni a, anni hi hmachhawn châkawm loh ber zinga mi an nih rualin hneh châkawm ber a ni. Electric Vengin pressure nei loin an khel a, an veng ṭantu ṭha zarah bul an ṭan ṭha bawk.

Minute 18-na lekah Isak Vanlalpeka'n freekick aṭangin a khung a, minute kaw hnuah David Lalchhuanawma siamsak chu Vanlalhmangaiha'n goal-ah a chantir a, darkar chanve pawh tling loah Electric Vengin 2-0 in hma an hruai.

Mumang ramah Electric Veng an cheng zui a, beisei ngam loh chu a taka thleng thei a nih tak avangin player leh supporter-ten pressure an ngah a, hlauhthawnna nen an khelh chhunzawm.

AFC an vanduai
Aizawl FC-in tawnhriat nei ṭha defender Lalrinchhana Tochhawng leh I League-a hmun pawimawh chang pha Hmingthanmawia te hliam vangin an chhawr thei lo a, an tlarhnung a nghin phah hle.

I League club hian goal an chhuah hma avangin Electric Vengin defensive game khelhna hun remchang an nei a, Aizawl FC tlar hmaten goal chance insiam an harsat a, goal khung an harsat bawk.

Kelkang tlangval Mapuia'n Aizawl FC chance neih ṭhat ber a hlah a, AFC striker hian tauh goal leh tho mah se result a danglam phah lo.

Danglamna mipui
Electric Veng manager Lalchhanhima chuan, "Kan nauten an theihna zawng zawng an chhuah a, Aizawl FC kan hneh thei hi kan lawm hle. Kan hmabaka match-ah pawh tun ang zela kan fight hi a pawimawh. Chutih rualin kan chakna hnar hi mipui an ni a, ṭawiawmna ṭha kan neih zel kan beisei a ni," tiin Vanglaini a hrilh.

EFC coach Vanlalsawma Colney chuan an ṭawngṭai rah a nih thu a sawi a, Electric Veng lawmna belh chhahtu tur chu Aizawl FC an hneh theih nan hian an veng tlangval pahnih Vanlalremkima (Tetea) leh C. Laldinmawia te midfield-ah an ṭangkai hle.

Coach thar thukhawchang
Aizawl FC-in an duh ang player an lak bakah an duh ang coach an la thei a, tun season-a AFC enkawltu I League season hnuhnung bera Neroca pahnihna nihpuitu Gift Raikhan a ni.

Manipur coach Gift chuan, "Goal hnih ven theih tur kan chhuah kha a pawi a, khami hnu kha chuan goal venghim tura tlarhnunga an inrem tam avangin a harsa tawh a ni. Electric Vengin ṭantu an neih ṭhat avangin player-te pawh an phur phah a, Aizawl FC pawhin ṭantu nei tam turin goal kan khung a, hnehna kan chan a ngai," tiin Vanglaini a hrilh.

Group A
27 July, Zirtawpni
Chanmari FC 2–0 Bethlehem VT FC
CFC : Laldampuia 28'; Lalrammuana 90+1'
MoM: R. Lalawmpuia, CFC
Aizawl FC 1–2 Electric Veng FC
AFC : Lalkhawpuimawia 85'
EFC : Isak Vanlalpeka 18'; Vanlalhmangaiha 27'
MoM : Lalrinnunga, EFC
31 July, Thawhlehni
2:00 PM Electric Veng FC Vs Chanmari FC
7:00 PM Bethlehem VT Vs Ramhlun North
2 August, Ningani
2:00 PM Ramhlun North Vs Electric Veng FC
7:00 PM Chanmari FC Vs Aizawl FC
4 August, Inrinni
2:00 PM Aizawl FC Vs Ramhlun North
7:00 PM Electric Veng FC Vs Bethlehem VT
7 August, Thawhlehni
2:00 PM Bethlehem VT Vs Aizawl FC
7:00 PM Ramhlun North Vs Chanmari FC

Group B
28 July, Inrinni
Mizoram Police FC 2–1 Chawnpui FC
MPFC : Lalbiakhlua 61'; Lalfakzuala 62'
CHFC : Vanlalnghenga 7'
MoM: Lalbiakhlua, MPFC
Chhinga Veng FC 2-0 Kanan FC
CVFC : Vanlalzuidika 13'; Lalromawia 73'
MoM : Lalromawia, CVFC
1 August, Nilaini
2:00 PM Kanan FC Vs Mizoram Police
7:00 PM Chawnpui FC Vs Jamshedpur
3 August, Zirtawpni
2:00 PM Jamshedpur Vs Kanan FC
7:00 PM Mizoram Police Vs Chhinga Veng
6 August, Thawhṭanni
2:00 PM Chhinga Veng Vs Jamshedpur
7:00 PM Kanan FC Vs Chawnpui FC
August 8, Nilaini
2:00 PM Chawnpui FC Vs Chhinga Veng
7:00 PM Jamshedpur Vs Mizoram Police