Romawia'n goal mawi a khung

Chhinga Vengin Inrinni zanah Kanan FC 2-0 in an hneh a, Santosh Trophy hnuhnung bera Mizoram aiawha hming chher Lalromawia'n goal mawi zet a khung a, he mi hma hian Vanlalzuidika'n a thun bawk.

Chhingcows hi MFA Super Cup-ah Aizawl DFA hnuaia first division club Kanan FC nen hun pangngaiah an inhnehtawk a, Lalsangzuala Hmar hoten chetsualna ngaiah tihsual nawn an tum lo.

Chhinga Vengin player che rang an luhtir a, star player ṭhenkhat dah ṭha turin an squad a chhah tawk bawk.

Minute 13-na lekah Lalṭhathanga Hmar corner pet chu Vanlalzuidika'n a tauh lut a, Chhinga Veng dinhmun a ṭha nghal. Chhingcows hian captain Lalrinchhana Tochhawng thlak nan Lunglei tlangval Zuidika an la lut a, Assam football club ASEB tana khel ṭhin hian MFA Super Cup an champion-na kawngah pawh a thawh hlawk hle.

Kanan hian first half-ah chance insiam ve bawk mah se team ṭha zawk danglamna second half-ah a lang a, Chhinga Veng hian bench aṭangin MPL best forward ni tawh MS Dawngliana, Shillong Lajong midfielder hlui Jacob Lalrawngbawla leh India junior team tana khel tawh Lalremruata te an la luhtir thei a, Kanan nen an squad a inchhah hleih hle.

Minute 73-naah Romawia'n midfielder Lalrinchhana hnen aṭanga a ball hmuh chu kawh pawtin yard 25 vel aṭangin a khung a, he goal hian Chhinga Veng chakna a nemnghet.