Chawnpui par thliaktu Police

MPL kaithar Chawnpui FC-in Mizoram Police lamah goal khung hmasain an phur hman viau a, a tawpah Police 2-1 in an chak.

Inrinnia LG Independence Cup Group B inkhel hmasa berah hian Vanlalnghenga'n minute 7-na lekah Chawnpui tan goal a khung a, Mizoram Police-in Lalbiakhlua leh Lalfakzuala te hmangin second half-ah an chhang let. Police winger Keifang tlangval Biaktea chu man of the match a thlan a ni.

Chawnpui ṭha zawk
Chawnpui assistant coach Lalrindika chuan MFA Super Cup first round-a an chak loh hnuin I Day Football atan an insiamrem tawh thu Vanglaini a hrilh a, hmasawnna hmuh tur a awm nghal.

Chawnpuiin bul an ṭan ṭha a, Vanlalnghenga hmangin minute sarihna lekah goal an khung. Goal khung belhna chance pawh an ngah chhunzawm a, corner aṭanga goal khung theihna hun ṭha an hlah a, K.Roluahpuia (Mama) leh Lalruatfela (RF-a) ten wall pass hmanga Police tlarhnung an ṭhiah hnuah Republic Veng rawlthar RF-a'n goal-ah a chantir thei lo.

Tlarhmaa awm Kolasib tlangval Vanrammawia Ngente a hriam tawk lo a, Mama'n hun ṭha neih a hlah ve bawk avangin first half-ah MPL kaithar hian goal khat chiah an khung.

Police nge nge
Second half-ah Mizoram Police-in Chawnpui inthlahdah lai an nang fuh. Minute 61-naah Chawnpui defender-in Biaktea an veng uluk tawk lo a, Police winger tlan chak hian lalutin an si phurh a sut a, minute khat hnuah corner kick-ah ven loa awm Fakzuala'n chakna goal a tauh lut.

Hun rei lote chhungin tawnhriat ngah zawk Police chu dinhmun ṭha zawkah an ding a, Chawnpuiin nawr leh mah se captain Lalhlimpuia chu hun tawp lamah hnawhchhuah a ni a.

Lalbiaksanga Colney hoten player 10-a khel MPL kaithar Chawnpui lakah point thum an hlawh chhuak a, a tira che ṭha Chawnpui a tawpah an ngui.