Matic-a'n season ṭan dawn lo

Manchester United midfielder Nemanja Matic chuan a pumah hliam a tuara a, a hliam hi zai a nih avangin season bul a ṭan ve theih loh tur thu United boss Jose Mourinho chuan a sawi.

Kum 29 mi midfielder hi Red Devils-in pre season friendly match an khelh hoah pawh hliam vang hian a inlan ve thei lo. Mourinho chuan, "Matic hi World Cup aṭang khan hliam neichungin a rawn kir a, season ṭan hmaa dam turin hunin a daih lo.

"Philadelphia lamah top specialist hmu turin a kal a, zai nghal niin clinic pawh a la chhuahsan lo a ni," tiin a player chuan inkhel thei tura hun a la duh deuh tur thu a sawi.

Chelsea midfielder hlui hi Antonio Conte-a'n mamawh tawh loa a inhriat avangin season hmasa ṭan dawn khan Manchester United lamah a in pu lut a, a season hmasa berah hian match 49 khelin goal hnih a khung a ni.