Shaqiri goal a mawi ; Liverpool leh United boruak a 'hot' ṭan
Pre season friendly match-ah Liverpool leh Manchester United an intawng a, Reds hian an hmelma kumhlun hi 4-1 in an sawp.
Liverpool tan Xherdan Shaqiri chuan overhead kick hmangin mawi zetin a khung a, Sadio Mane, Daniel Sturridge leh Sheyi Ojo ten goal khat ṭheuh an khung bawk a, United tana Andreas Pereira goal khung chu scoreline ti mawitu chauh a ni.
Team pahnih inkhel hi 'friendly match' mai ni mah se inkhelh zawhah manager pahnihin thusawi an ngah avangin a boruak a san chhunzawm a, Liverpool leh United inkhel an nih miau avangin boruak a sang hi a a awm lo hran lo.
Engmah lo mai
United-in goal li ngawt an chhuah avangin an mualpho a, manager Jose Mourinho erawhin a ngai thutak lo–inkhel engmah lo mai a nih thu a sawi!
Mourinho chuan, "Ka squad kha en ula, United squad dik tak 30% pawh a tling lo. Paul Pogba, Marouane Fellaini, Marcus Rashford, Jesse Lingard, Nemanja Matic leh Antonio Valencia te hi ka squad chu an ni," a ti a, an ṭhat dan bera khel an nih loh avangin Liverpool laka an result chu in teh nan a tling tawk loah a ngai.
Reds nena an inkhelah hian hliam vangin Chris Smalling a inhnukdawk a, a aiah Eric Bailly luhtir a ni. Mourinho chuan, "Eric kha khel lo tur a ni a, mahse naupang hlir khelhtir ringawt kha ka duh lo a ni," a ti.
Referee thiam loh!
Liverpool goal khung pali zinga goal hnih chu penalty hmanga chhuih luh a ni a, Mourinho a lawm lo hle. Portuguese manager hi an goal hmasa ber chhuahna penalty-ah phei chuan match official te nen rei tak an inhnial–inkhel engmah lo maiah a ngai tak tak lo niin a lang.
Mourinho chuan, "Referee te hi tihsual thil thuah an rawn kal ni maiin ka hria. Baseball federation lamin an match enkawl turin an ko a, mahse football a lo ni si a ni," tiin a tih el–baseball larna ram American mipui tan a ngeiawm ang.
Michigan Stadium-a inkhel hi mipui 101,254 in an thlir a, Mourinho erawhin, "Stadium-ah thawm a ṭha a, mahse anni ang chu ni ila he inkhel mai mai en tur hian ka pawisa ka seng lo ang," a ti–inkhel a sawi nep tlat!
Sanchez a hlim
United player langsar zingah Alexis Sanchez-a'n inkhel bul a ṭan a, ball ṭha hmu thei lo Chilean forward hi khelmualah a lungawi lo tih a lang–Mourinho erawhin a player hi a hlim thu a sawi.
Portuguese manager chuan, "Alexis hi he hmuna goal nawr tur kan neih awmchhun a ni a, winger emaw striker dang kan nei lo. Khelmualah a lungawi lo nia a lan chhan chu kha aia ṭha zawka khelh a duh vang a ni mai," a ti.
USA-a zin chhuak zingah hian Valencia leh Nemanja Matic chu hliam vangin an inlan thei lo a, Anthony Martial chu a nupuiin nau a hrin sak avangin a haw bawk.
Sturridge ringtu Klopp
US pre-season tour-ah Daniel Sturridge a che ṭha a, Liverpool boss Jurgen Klopp chuan hliam vanga talbuai reng a player hi a 'fit' ṭhat theih nan theihtawp chhuaha a puih tur thu a sawi.
Klopp chuan, "Daniel hi player ṭha tak a ni a, a in fit phawt chuan he team-ah hian hmun pawimawh a chang ang," a ti–Sturridge hian hliam vangin season thum chhungin Premier League match 23-ah chiah inkhel bul a ṭan.
German coach chuan, "Mimal tak pawhin training ka neihpui mai ang. Liverpool ka pan khan Sturridge te ang player ṭha an awm sa tih ka hriat avangin ka phur a, mahse hliam vangin a khaw lo zo ta a ni. Season khatah match 50 chu a khel kher lo ang a, mahse match erawh a khel nual ang," tiin Sturridge chu a ruahmannaah a tel thu a sawi.
Klopp nuih a za!
Liverpool leh United intawn hma hian boruak a awm ṭan der tawh a, tun hnai thla 12 chhunga player lakluh nana pound maktaduai 250 dawn sengtu Jurgen Klopp chu Mourinho-a'n, "Heti zat sum a hman chuan a champion ngei a ngai ang," tiin pressure pek a tum!
Klopp erawhin, "Duh duh kan sawi theihna khawvelah kan awm a, Jose nen hian buaina ka nei lo. Fans leh club neitute chiah ka ngaihtuah a, Manchester United lam hian ka lung a len vak lo," a ti a, Jose ngaihdanah a buai lo.
German coach hian fiamthu thawh zuiin, "Hman aṭanga ka tum tawh chu hlim taka Jose nuihtir hi a ni," a ti a, Portuguese manager chu sawisel tur zawng rengah a puh.