Zarkawt BCA an champion; Lalrina'n 3 pts vawi 11 a lut

Tualchhung basketball season ṭan nana khelh ṭhin MBBA Cup chu Zirtawpni zan khan Hawla Indoor Stadium-ah a hmawr bawk a ni ta a, Zarkawt BCA chuan 94-79 a Khatla TBL sawpin an champion.

Zarkawt BCA hi MSL hnuhnung bera champion an ni a, Mission Veng Vikings aṭanga Lalrina Renthlei an lakluh hnuah Zarkawt club an danglam. Tuikhuahtlang tlangval hian Vikings a champion pui hnuah season liam ta khan BCA chu champion puiin Most Valuable Player-ah thlan a ni.

MBBA Cup-ah pawh Lalrina bawk a langsar a, Khatla TBL-in ven ngaihna an hre lo. MSL hmasa pahnih champion TBL hian an coach H. Laldinsanga tel loin tun hma an pha lo a, Mapuia hian India junior team a enkawl avangin MBBA Cup-ah a inrawlh lo.

BCA erawhin MSL4 MVP Lalrina hoin ṭum dang ang thoin an game a mawi a; Lalrina hian vawi 11 zet 3-points a lut a, point 47 zet a nei bawk a, MSL4 final-a hero bawk kha MBBA Cup 2018 final-a hero a ni.

BCA tan hian Zarkawt tlangval pahnih Matthew Remtluanga Sailo leh Sangkima bakah Ramthar tlangval Zonunsanga te an khel ṭha viau bawk.