Murray a lo kir dawn

World number 1 hlui Andy Murray chu hun rei tak chung hliam vanga a chawlh hnuah a inkhel thei ve leh tawh a, tunkar chhung hian tennis court-ah a rawn kir dawn; Washington Open-a a match hmasa ber atan Mackenzie McDonald a hmachhawn ang.

Kum 31 mi Murray hi season hmasa Wimbledon-ah khan a inhliam a, a khel bawr hliam hi dam mai tura ngaih ni mah se kumin January thla khan zai a ni. Tun thla tira khelh zawh tak Wimbledon-ah khan inlan tumin a hming pawh a pe hman, mahse a taksa dinhmun ngaihtuahin a inhnukdawk leh ta zawk.

Grand Slam vawi thum champion tawh Murray hi a inkhelh loh rei tawh avangin a ranking pawh a hniam tawh hle, tun hma lama number 1 dinhmun pawh luah zak zak tawhtu hi world number 838 a ni mek.

Britain tlangval Murray hian first round a paltlang a nih chuan a hnampui Kyle Edmund nen an insu dawn a ni. Washington Open bakah hian August thla a khelh tur Cincinnati Open lam chuan wildcard an pe a, hei vang hian tun season chhunga Grand Slam hnuhnung ber US Open atan inbuatsaihna ṭha a nei thei ang.