Man City lawm a kim lo

Bayern Munich laka si hnih an phurh hnuah hnehna chang let thei mah se Manchester City lunglawm a kim lo, an player manto ber Riyad Mahrez chu ke rek hliam vangin lakchhuah a ngai.

Pathianni zing khan Miami, US-ah Premier League champion hian Bayern Munich chu season thar inbuatsaihna neihpuiin 3-2 in an hneh a, an inbuat­saihna hnuhnung atan Pathianni zan hian Chelsea nen Community Shield an inchuh zui leh ang.

Thawhlehna

Pep Guardiola-a'n rawlthar rual a luhtir a, player paruk ngawt chu kum 20 hnuai lam an ni. German club lamin bul an ṭan fuh a, a tir lam minute 25 chhung lekin Meritan Shabani leh Arjen Robben te goal hmangin 2-0 in hma an hruai, senior player Franck Ribery a khelh ṭhat bawk avangin khung belh nual tura ngaih an ni.

Amaherawhchu, EPL champion hi an tlawm mai bik lo. Hliam vanga Mahrez lakchhuah a nih hnuah Bernardo Silva a rawn inlar a, Portugal international hian an si phurh a sut bakah chakna goal a khung a, Silva goal pahnih inkarah kum 19 mi Lukas Nmecha chuan goal khat a thawh ve bawk. Nmecha hi Germany a piang ni mah se kum bithlaih inlena lamah chuan England tan a khel thung.

Rawlthar rual

Pep-a naute hian an match hmasa lamah Borussia Dortmund leh Liverpool te an ngam lo tawh a, World Cup khel player ṭhenkhat an la kir loh bawk avangin inbuatsaihna ṭha tak an nei lo. Chak an mamawh lai takin Bayern an ngam thei a, hei hian Community Shield an khelh tur atan inrintawkna siam tura ngaih a ni.

Senior player tam zawk awm loh ṭumin kum 18 mi Spanish forward Brahim Diaz chu hmunnawm khawpin a khel ṭha a, a hun ṭha neih a khung lo erawh a ui khawp ang. Nmecha-a'n goal a khung bakah a ban a tih per bawk a, kum 18 mi tho Luke Bolton pawh tlarhma lamah a khel che lo.

Rawlthar rual zinga hmuhnawm tak pakhat chu Phil Foden a ni. Under 17 World Cup-a England champion puitu midfielder hian inkhel a thunun a, a ball thiamna leh finna chu Man city fans tan hmuhnawm a tling, an goal hnuhnung ber siamsaktu pawh kum 17 mi chauh substitute Adrian Bernabe a nih avangin Pep-a team-ah rawlthar beiseiawm an tam tih a chiang.

Mahrez a inhliam

Tun thla tir khan Manchester City-in pound maktaduai 60 sengin Riyad Mahrez an lalut a, Algerian international forward hi Man City player manto ber a ni hial. Leicester City tan a thiam thil a lantir fo tawh avangin season tharah pawh Pep-a kaihhruaina hnuaia vul viau tura ngaih a ni.

World Cup a khelh loh avangin Mahrez-a'n club training a zawm hma a, hei vang hian Bayern Munich lakah pawh inkhel bul a ṭan. Mahse, ṭan aṭanga minute ngana lekah defender Chris Richards nen ball an inchuhna lamah a ke rek a hliam a, he thu buatsaih lai thleng chuan a hliam nat zawng hi chiang taka hriat a la ni lo.

Premier League cham­pion hian an player thar hi Community Shield-ah an chhawr thei ang em tih chu zawh­na awm nghal a ni a, City manager Guardiola chuan, "A ke rek a ni a, engtia rei nge a chawlh dawn ka la hre thei lo. Hliam na lo pawh a ni lo hlauh thei," a ti.

Spanish manager hian Liverpool an ngam loh ṭuma hliam tenau tuar Leroy Sane pawh inkhel turin a dinhmun a la chian loh thu a sawi a, Germany international hi Blues lakah erawh inlan thei tura ngaih a ni thung.

Player Inlan

Bayern: Ulreich, Wagner (Zirk­zee 70), Ribery (Zylla 85), Robben, Rafinha (Gnabry 46), Alaba, Will (Johansson 76), Coman, Meier, Richards, Shabani

City: Bravo, Laporte (Gomes 67), Mahrez (B Silva 28), Zinchenko, Soares, Nmecha, Foden (Garre 86), Garcia, Diaz (Harrison 67), Bol­ton (Bernabe 66), Humphreys.