Sania Mirza a la chawl lo

India nula zinga tennis khel thiam langsar Sania Mirza chu khup hliam vangin a reh rei ta hle a, tunah hian a fa pakhatna tur a pai leh tak avangin hun rei tak chhung chu court chhungah a hmel kan hmu dawn lo.

Mahse, Mirza hian chawlh a la tum lo, 2020 Tokyo Olympic-ah chuan India tan medal vuak chhuah theih ngei a la tum thu a sawi. Mirza chuan, "Tunah hian 2018 kan hmang mek a ni a, ka thil tum chu 2020 Tokyo Olympic a ni," tiin a sawi.

Kum 31 mi Mirza chuan sawi zawmin, "Ka thil tum hi a la hla hle tih chu ka hria, mahse fa kan neih zawh meuh chuan a rawn thleng chho ve leh mai turah ka ngai," a ti. Hmeichhe doubles world number 1 hlui hian infiamna chuan a pasal nen zirlai ṭha tak a chhawpchhuah sak ṭhin thu a sawi ve bawk.