Golovin-a'n Monaco a pan

AS Moanco chuan CSKA Moscow aṭangin Aleksandr Golovin chu kum nga chhung atan an lalut a, Chelsea nen pawha sawi zawm tawh Russia midfielder man zat hi tarlan ni lo mah se, khawthlang media-te chuan pound maktaduai 27 niin an tarlang thung.

Kum 22 mi Golovin hian World Cup a khel ṭha hle a, inkhel paliah bul ṭanin goal khat a khung. 2010 world champion Spain an hneh theih nan pawh a khel ṭha hle a, an ram hi quarterfinal a hruai thleng hial a ni.

Monaco vice president leh chief executive ni bawk Vadim Vasilyev chuan, "European club lian tam takin Aleksandr hi lak an duh a, mahse keini chuan hma a sawn zel theihna tur kawng kan sih hmuh zawk a ni," tiin an player thar chungchang a sawi.