League Cup: Semifinal lut tur zawn a hun ta

English football-a inelna ngaihven hlawh zinga mi, Carabao Cup quarterfinal chu nizan khan khelh ṭan a ni a, Arsenal leh Sunderland te inkhelin, he thu buatsaih a nih lai hian result kan hre hman lo.

Zanin dar 1:15-ah quarterfinal match pathum dang khelh a ni dawn a, Premier League club ṭhah an inkhelh dawn avangin a hmuhnawm ang - heng zingah hian Liverpool-in Leicester City an mikhual tur chu en châkawm langsar zual a ni.

European champion Chelsea chuan Brentford an lenchilh dawn a, tun hnaia result nei ṭha thei lo Blues tan insiamremna remchang a ni thei dawn - a awlsam erawh ring suh.

Antonio Conte hnuaiah Totten-ham Hotspur an insiamṭha mek a, Liverpool nena inhnehtawk hlim team hian David Moyes hnuaia team khauh tak West Ham an mikhual dawn - quarterfinal-ah replay an khel dawn lo.

Record nei ṭha
League Cup-a champion ngun ber chu Liverpool an ni a, Manchester City nen vawi riat ve ve an champion tawh. City-in tun season-ah quarterfinal an lut phak lo a, Reds tan tun hi champion ngun ber ni tura City tlanpelhna remchang a ni.

Liverpool-in League Cup nomawi an chawi hnuhnun ber hi 2011–12 a ni tawh a, Jurgen Klopp pawhin he nomawi hi chawi ngei a duh ang - Liverpool a zawm hnuah League Cup leh FA Cup-ah a la champion lo.

Mahse, Liverpool tan champion tur chuan Leicester paltlang phawt a ngai dawn a, Brendan Rodgers-a enkawl team hian nomawi chawi ve tho an duh dawn avangin a awlsam lo ang tih erawh a chiang.

Rodgers-a enkawlna hnuaiah Foxes hi season hmasa khan FA Cup-ah an champion a, Community Shield nomawi nen tun season bul an ṭan bawk - mahse, league leh Europa League lamah beisei an phak lo zui a, Rodgers tan a hmingchhe tur thup nan League Cup a pawimawh.

Covid buaina
Hri lengin kianzai a rel thei lo a, Liverpool pawh Covid-19 vangin an buai - Virgil van Dijk, Thiago Alcantara, Fabinho leh Curtis Jones te chuan Covid-19 an kai a, zaninah an inlan a rinawm loh.

Klopp pawhin a chhawr tam loh player-te khelhtirna hun atan a hman hrim hrim a rinawm a, Tottenham laka bul ṭan dun Tyler Morton leh James Milner chu midfield-ah an inkawp nawn a rinawm a, Alex Oxlade-Chamberlain-a'n bul a ṭan a rinawm bawk.

Hliam vanga a chawlh reng hnuah Roberto Firmino a inlan thei leh tawh a, Brazilian forward hian Takumi Minamino leh kum 17 mi Kaide Gordon te nen tlarhma an rawn luah a nih pawhin a mak lo ang.

Foxes-in Wesley Fofana an la chhawr thei lo a, Caglar Soyuncu leh Jonny Evans an inhliam bawk avangin defensive midfielder Daniel Amartey leh Wilfred Ndidi te chu tlarhnungah an khelh a rinawm.

Chelsea an buai
Inelna hrang hranga an match hnuhnung pangaah vawi khat chiah Chelsea an chak a, zaninah insiamṭhat an mamawh - mahse, Covid-19 vangin London club pawh hi an buai.

Kar hmasa khan Blues hian Covid-19 kai player pasarih an nei a, Wolverhampton Wanderers nena an inkhelah pawh Tuchel-a'n bench-ah player pakua neih theih aṭangin player paruk chiah a rem thei - goalkeeper pahnih an tel!

Hri leng kai player zingah Romelu Lukaku, Timo Werner, Callum Hudson-Odoi leh Ben Chilwell te an tel a, Wolves nena an inkhelah Trevoh Chalobah leh Hakim Ziyech te an inhliam bawk - anni erawh an hliam a serious lo tura ngaih a ni.

Tuchel-a'n an ṭhat dan berin team a rem thei dawn lo chiang a, chutihrual chuan chhawr theih zinga mi Kepa Arrizabalaga, Saul Niguez, Ross Barkley leh Mateo Kovacic te ringawt pawh ṭhatpui tham an ni a, Blues fan-ten chak loh an duh lo ang.

Hei le Spurs
Spurs khelmualah West Ham an leng dawn a, Spurs hian an match hnuhnung berah Liverpool inhnehtawkpui mah se an khelh danah lawmna tur a awm a, Hammers an zuam sawt ang.

Tottenham hian eng inelnaah pawh champion nomawi an chawi hnuhnun ber chu 2007-08 season kha a ni a, League Cup-ah an champion - hemi hnuah hian eng inelnaah mah an champion leh tawh lo.

Conte tan a hming chher turin League Cup champion pawh a hlu dawn a, player-tea inrintawkna tuh turin League Cup nomawi a hlu viau bawk - an theihna zawng zawng nen an khel ang.

Mahse, Hammers lakah chak a awlsam dawn lo - Moyes-a hoin Europa League round of 16 an lut a, Premier League top five-ah an la awm a, League Cup quarterfinal lut turin Manchester United leh City an pet chhuak a, Spurs an hlauh ring suh.