Mizoram volleyball team inpeih

Volleyball Federation of India (VFI) hnuaia inelna National Junior Volleyball Championship khel turin Mizoram a inpeih tawh. Mizoram Volleyball Association (MVA) team hian December 23, Ninganinah inelna neihna tur hmun Burdwan, West Bengal an pan ang.

Inelna hi December 25-30, 2021 chhunga khelh tur niin, Mizoram hian mipa leh hmeichhe team a tir chhuak ang. VFI vice president & MVA Sr. vice president ni bawk Dr. Lalmalsawma Nghaka chuan Mizoram team kalna tur hi a ruahmansak a ni.

Mipa team hi NIS coach Eric Pautu chuan enkawlin, TNT Muanna Vengah camp neihpui an ni. Hmeichhe team hi Aizawl pawn lam district dang aṭanga kalte chu Mizoram Volleyball Association Office, Tuikual North Indoor Stadium-ah camp pui an ni thung.

Aizawla awm te erawhin mahni in aṭangin practice an zawm ṭhin. Coach Donald Khawlhring hoin, zing leh tlaiah Tuikual North Indoor Stadium-ah ngawrh taka practice ṭhin a ni.

Mizoram team-ah hian MVA chuan beiseina sang tak a nei a, medal la ngei tura ngaih leh beisei thlan chhuah te an nih thu an sawi. MVA chuan thu chhuah siamin, "Kristiante hunpui kalsana inkhel tur an ni hi hrehawm ti viau mah se, Pathian ram zauhna tùr a nih ngei kan beisei.

"Chutiang taka an khelh chhuah theih nan leh sakhaw dangte entawn tlaka dinhmun sâng taka an din theih nan Mizoram mipui ten nasa taka ṭawngtaipui turin kan sawm bawk a ni," an ti.