Nadal-a'n hripui a kai

Rafael Nadal chu Mubadala World Tennis Championship a khelh zawh hnuah a hriselna dinhmun endik a ni a, world number 1 hlui hian Covid-19 a kai tih hmuhchhuah a ni - an ramah enkawl a ni ang.

Grand Slam vawi 20 champion tawh Nadal chuan, "Abu Dhabi tournament ka khel zo kha Spain-ah ka haw a, PCT test hmangin hri ka kai tih hmuhchhuah a ni. Abu Dhabi leh Kuwait-ah khan ni hnih danah test kan nei a, khatah kha chuan ka fihlim.

"Awm nawm lohna deuh ka nei a, tunah chuan hri laka a rang thei ang bera ka fihlim leh theih nan ka in enkawl a ngai. Tournament ka khelh choh dan tur erawh ennawn a ngai dawn. Dam leh thuai tura min duhsaktu leh min thlawptu zawng zawng chungah lawmthu ka sawi," a ti.

Kum 35 mi Nadal hi hun rei tak chhung hliam vangin a chawl, tun hnaiah a lo kir ve leh chauh. Abu Dhabi-ah hian Andy Murray a hneh lo a, hun rei tak hnua match pangngai a khelh lehna hmasa a nih avangin a tan a awlsam lo.

January 17 aṭangin Asutralian Open khelh a ni dawn. Spanish star hian Melbourne khawpuia inelna lian hmachhawn hma hian ATP tournament tenau zawk khelh leh ngei a la tum a, tunah erawh a hriselna dinhmun a ngaihtuah hmasak a ngai dawn.