MBBA-in champion team an hmuak

Mizoram Basketball Association (MBBA) chuan nimin khan Ch. Chhunga Truck Terminal, Rangvamual-ah BFI North East Zonal Championship-a champion Mizoram team an hmuak a, chawimawina hun an hmang.

Champion team hmuahna hi MBBA vice president Dr. Vanlalthlana'n a kaihruai a, president Dr. Lalrinawma Hnamte-in thusawina hun hmangin India hmarchhak champion team-te chu a chhuan thu a sawi.

Mizoram mipa team hian India hmarchhaka basketball thiam ber ni turin an khingpui Tripura (124-8), Meghalaya (64-53), Nagaland (67-53), Manipur (95-64) leh Assam (85-68) te an hneh vek a, 71st Senior National Basketball Championships khelh theihna ticket an hlawh chhuak.

India ram pum champion zawnna hi January 23-30, 2022 hian Chennai, Tamil Nadu-ah khelh a ni dawn a, team 16 an inel ang. Final round-ah North, South, East leh West Zone ten team pathum an thawh dawn a, North East Zone aṭang erawhin champion team Mizoram chauh an tel ang. Heng bakah hian Services, Indian Railways Team leh inelna thlengtu Tamil Nadu ten final round hi an hmachhawn ang.