FA Cup-ah replay a awm dawn lo

Covid-19 in Europe ram a run leh tak avangin inkhelh hun sawn a tam a, Football Association chuan buaina sut kian nan FA Cup third leh fourth round-ah replay a awm tir dawn lo.

FA Cup-ah hian fixture an pawha team hmasa zawk home-ah khelh ṭhin a ni a, an inhnehtawk erawh chuan team pakhat zawk khelmualah replay khelh ṭhin a ni. Tun ṭum third leh fourth round-ah erawh minute 90 chhunga an inhnehtawk a nih chuan extra time an khel ang a, chak zawk an la awm lo a nih chuan penalty hmanga chak zawk zawn tur a ni ang.

FA Cup third round-ah hian team 64 an la awm a, January 7-10, 2022 hian khelh a ni dawn a, Premier League club an inlan ṭan dawn. Fixtures pawh a ni tawh a, Manchester United chuan Steven Gerrard enkawl Aston Villa chu Old Trafford-ah an mikhual dawn.

Fourth round-ah team 32 chiah an awm tawh dawn a, February 5-6, 2022-ah khelh a ni ang. FA Cup-ah hian Leicester City chu champion lai an ni.