Krismas laia hmahruaitu Man City an champion dawn em?

Kumin Premier League-ah Covid-19 in nghawng lian tak a rawn nei leh a, fixtures khelh tur angte khelh theih loh a awm nual avangin rinlawk thiam a har hle. Tun season Krismas laia Premier League hmahruaitu tur chu Manchester City an ni a, Citizens hian Krismas laia ṭum hnih hma an hruai ṭumin an champion ve ve.

Chutihrualin Premier League season 29 khelh tawh kan thlir kir chuan ṭum 14 zet Krismas laia hmahruaitu an champion lo a, tun season-ah Man City hi an champion lo a nih chuan Krismas laia hmahruaitu champion leh champion loh zat a intluk chiah ang.

Thawnthu ngaihnawm - 1996
Kum 1996 Krismas kha Manchester United tan chuan Krismas hlimawm tak tia sawi chi a ni lo. Premier League table-ah parukna an ni a, hmahruaitu Liverpool an phak lohna chu point sarih lai a ni.

Mahse, season an hman zawh meuh chuan Manchester United-in Premier League nomawi an chawi a, Liverpool-in palina dinhmun luah chungin season an khar.

Man City thlamuanna!
Man City ṭantute tan erawh thlamuanna tur a tam. Season hnuhnung 17-ah vawi 12 zet Krismas laia league hmahruaitu an champion. Ṭum danga vanduai ṭhin Liverpool pawh an vannei ta bawk.

Reds hian 2013 Krismas lai khan Premier League-ah hma hruai mah se Steven Gerrard chetsual leh Crystal Palace laka an tawlhthluk an vanduai pui a, uiawm takin Manchester City lakah an kut hmawra an khawih tawh league nomawi chu an thlauh.

Liverpool hi Krismas laiin ṭum ruk hmahruaitu an ni tawh a, 2019-20 season khan an club history-a a vawi khat nan Premier League nomawi an chawi. Reds hi an champion ṭumin Krismas laiin hmahruaitu an ni a, tun season-ah erawh Jurgen Klopp-a hote hian Krismas laia hmahruai lo chungin an champion thei a ni tih an pholan a ngai.

Amaherawhchu Man City hi Premier League an champion hmasak ber ṭumin Krismas laiin hmahruaitu an ni a, an champion. Pep Guardiola hnuaia an champion hmasak ber ṭum pawhin Krismas laiin hmahruaitu an ni a, kuminah Krismas laiin hmahruaitu an ni leh a, champion tura rinkai an ni leh bawk.

Spice Girl leh Arsenal!
Kum 1997 Krismas laia Spice Girl hla hit chu 'Too much' tih a ni. Khatih laia Premier League hmahruaitu chu Man United an ni a, parukna dinhmun luahtu Arsenal nena an inthlauhna chu point 13 lai a ni.

Arsenal tan khatih hunlaia an dinhmun ngaihtuah chuan 1997-98 season-a Premier League nomawi chawi tum chu 'Too much' tih baka sawi ngaihna a awm lo. Mahse, Arsenal-in club dangin tun thlenga an la tih theih loh an ti a, Mas ruai ṭheh laia parukna dinhmun luahtu team hi 1997-98 season a zawh meuh chuan Premier League champion an ni.

Man United leh Arsenal hi Krismas laia top four-a lang phak lo Premier League nomawi chawi thei awmchhun an la ni reng.

Thamral Magpies
Kum 1995 Krismas lai khan Newcastle United chu Premier League hmahruaitu an ni a, anhmahni hnaih bertu Manchester United aia an sanna chu point sawm lai a ni.

Mahse, Kevin Keegan enkawlna hnuaia an vanglai hmang mek Magpies an thamral zui a, season tawpah pahnihna dinhmun an luah a, Manchester United an champion daih!

Tun season-ah pawh Newcastle hian ngaihven an hlawh dawn. Magpies neitu thar Saudi Arabia Public Investment Fund hausakna hi pound tluklehdingawn 500 bawr vel a ni a, Premier League club neitu zingah hausa fal ber mah se relegate thei dinhmunah an ding.

Magpies hian match 18 an khelh tawh aṭangin point 10 chauh an hmu a, 19-naa awm chungin Krismas an hmang dawn. January transfer an hmang ṭha viau a nih loh chuan Newcastle tan insiamṭhat a har ang.

Mangṭha nomawi!
Kum 1998 Krismas laia Spice Girl hla hit chu 'Goodbye' tih a ni a, Aston Villa tana an sak emaw tih mai tur a ni! 1998 Krismas lai hian Villa chu Premier League hmahruaitu an ni a, an hnuai chiaha awm Chelsea aia an sanna chu point thum a ni.

Mahse, kum a thar rualin Villa an thamral a, John Gregory-a kaihhruai team hian an thiam an theihnghilh emaw tih mai tur a ni. 1998-99 season a tawp meuh chuan Manchester United an champion a, Villa erawh paruknaah awmin Premier League nomawi an 'mangṭha'! Premier League chanchina Krismas laia hmahruaitu club-in season an khar chhiat ber ṭum a ni.

Tun season-ah Villa-in Steven Gerrard an lalut a, Liverpool legend hnuaiah an khel ṭha hle. Krismas laiin Villa hi 10-naah an awm a, point 22 an hmu mek. Season tawpah khawiah nge an awm ang tih chu hunin a hril ang.