Mourinho a inringtawk

Jose Mourinho chuan amah sawisel tute a chhanglet a, tunah chuan AS Roma chu club lian hneh thei an ni tih a sawi. Roma hian an match hnuhnung berah Atalanta chu 4-1 in an sawp a ni.

Roma hian club lian hneh an harsat ṭhin, an elpui club an ngam ngai meuh loh avangin Serie A table-ah pawh an sang thei lo. Tunah chuan Atalanta an hneh thei ta a, beiseina pawh an neih san belh nasa hle.

Mourinho chuan, "Ka naute hian team ṭha hmachhawn dan chu an hria, an rilru puthmang a dik a nih phawt chuan eng team pawh hneh thei turin kan ṭha tawk, kan mamawh chu inrintawkna a ni.

"Atalanta laka kan khelh dan kha en let ila, a tir aṭanga a tawp thleng khan kan ti ṭha tluan zak. Palina nih hi a awlsam dawn lo a, chutih rualin kan tum takzet a nih chuan kan ni thei ang tih hi ka ring," tiin a naute a ringtawk hle.

Roma hian zanin dar 11:00 hian Sampdoria an hmachawn dawn a, kumina an match hnuhnung ber a ni ang. Serie A lam-in thlasik chawlh an hmang zui dawn a, January 6-ah match an nei leh chauh ang.

Zanin dar 11:00 hian champion lai Inter Millan chuan San Siro-ah Torino an lo mikhual ang.

Italy - Serie A
Sassuolo 09:00 PM Bologna
Venezia 09:00 PM Lazio
Verona 11:00 PM Fiorentina
Inter Milan 11:00 PM Torino
AS Roma 11:00 PM Sampdoria
Empoli 01:15 AM AC Milan
Napoli 01:15 AM Spezia