Season bul ṭan lo tur Thiem

Tennis season thar a hnai a, inelna bul ṭan nan thla khat pawh a awm tling tawh lo. Dominic Thiem chu kum thar tir lamah a inkhel thei dawn lo. Austrian star hi a hliam a la dam loh avangin a chawlh a la ngai.

January thlatirah ATP Cup leh Sydney Tennis Classic khelh a ni dawn, inelna pahnih aṭangin Thiem hi a inhnukdawk. Kar hmasa khan Mubadala World Tennis Championship aṭangin a lo inhnukdawk tawh bawk.

Kum 28 mi Thiem chuan, "Ka hritlang a, vanneih tlak takin corona-virus erawh ka kai lo. Kar hmasa kha chuan training pawh ka nei hleithei lo, chuvangin ka tan chuan tournament khel tur chuan a la hma lutuk deuh.

"Hliam na zawk ka neih leh ka hlau, chuvangin 100%-a ka dam hma chuan inkhelh luih loh ka duh. Tuna ka thil tum ber chu Australian Open 2022 khelh hman a ni," tiin season thara major tournament hmasa ber chu khelh ngei a tum.

Nikum March thla kha chuan Thiem hi world number 3 a ni phak. Amaherawhchu hliam vangin a inkhel mumal thei lo rei tawh a, a ranking pawh 16-naah a tlahniam tawh. Inelna a hmachhawn leh hunah chuan seeding a chang hnung deuh dawn tihna a ni.