Bagan-in Goa coach an chhuhsak

ATK Mohun Bagan chuan coach Antonio López Habas an ban hnuah a hmun ruak luah turin Juan Ferrando an lalut a, FC Goa coach hian Goan club-ah contract a neih avangin an lei chhuak.

Kolkata club hian assistant coach Manuel Casacallana chu coach lailawk atan an ruat thu an lo puang tawh a, mahse, Casacallana-a'n hna a thawh tak tak hmain coach nghet tur an lalut leh si a ni.

Ferrando hian Goan club-a a contract-ah release clause a ziak tel a, a zat tarlan ni lo mah se vaibelchhe khat nia sawi a ni. Bagan hian vaibelchhe khat hi FC Goa an pe a, Spanish coach an chang.

Kum 40 mi coach hian nizan khan an match hmasa berah ATK Mohun Bagan hi a kaihruai nghal a, he thu buatsaih a nih lai hian result kan hre hman lo.

Tun season Champions League-a rin loh taka Real Madrid leh Inter Milan pawh hnehtu Sheriff Tiraspol lo enkawl tawh coach hian season hmasa khan Goa hi a zawm a, a season hmasa berah ISL semifinal a hruai thleng a, season bul ṭan nan Durand Cup nomawi an chawi bawk.

Spanish coach chuan, "Hna ka thawh hmasak ber ni aṭangin 110% ka pe nghal ang a, fan-te pawhin football tak tak chu hmuhnawm ti taka thlirin lawmna tam tak kan chhar ho ka beisei.

"Kan team ten a ṭha thei ang bera an khelh chhuah theih nan tha thlah loin hna ka thawk dawn a ni," a ti a, Kolkata khawpuiah beiseina a nei sang hle.

Habas-a hnuaiah Bagan hian tun season-ah match ruk khel hmanin vawi hnih chiah an chak a, vawi hnih draw result neiin vawi hnih an tlawm - mahse, tun season-ah Goa aiin an result a ṭha zawk!

FC Goa hian tun season-ah match ruk an khelh aṭangin vawi hnih tho chak an nei a, vawi khat draw neiin vawi thum an tlawm - Bagan-in Habas ban hnua a aia che chhe zawk coach an lei chhuak hi thilmak a tling.

Goa hi coach lailawk niin Clifford Miranda chuan a enkawl dawn a, coach nghet turin Derrick Pereira leh Ángel Viadero hming lam rik mek a ni.

Indian coach lar Pereira hian Goa-ah hian technical director hna a chelh mek a, Mahindra United vanglai a lo enkawl tawh bakah a hunlaia club lar ṭhah Vasco, Pune FC, Salgaocar, DSK Shivajians leh Churchill Brothers a lo enkawl tawh.

Spanish coach Viadero-a'n Eibar leh Racing Santander te pawh a lo enkawl tawh a, season hmasa tawp lamah khan Spanish third division club UD Melilla enkawlin, tunah erawh club a nei lo.