Bellingham-a'n vaccine la turin chah

England midfielder Jude Bellingham chuan footballer-te chu Covid-19 vaccine dose hnih bakah booster la ngei turin a chah.

Kum 18 mi Bellingham hi Borussia Dortmund tan khelin player pawimawh a ni. Bellingham chuan, "Covid-19 laka him duhin vaccine dose hnih bakah booster ka la tawh. Hri leng hi chhungte bula tidarhtu ka ni duh lo a, Covid-19 vanga ink-helh theih loh ka duh lo bawk," tiin vaccine lak a pawimawh thu a sawi.

English midfielder Bellingham chuan sawi chhunzawmin, "Mi zawng zawngin vaccine hi an la ngei tur ka ti lo a, mimal duhthlanna a ni. Chutihrualin mi zawng zawng hi hri leng lakah him se ka ti a, vaccine la ngei turin ka chah duh a ni," tiin a sawi.

England manager Gareth Southgate pawhin Covid-19 laka him theih nan vaccine lak a pawimawh a thu a sawi bawk.

England
Premier League-in Thawhṭannia an tarlan danin Premier League player zinga 92% in dose khat tal an la tawh a, 77% in dose hnih an la tawh.
Italy
Serie A chuan player zinga 98% chuan vaccine ṭum hnih an la tawh niin an sawi. Juventus leh Italy defender Giorgio Chiellini chuan December thlatir khan social media kaltlangin booster la leh turin a ngen a ni.
France
France-ah chuan player zinga 95% in vaccine dose hnih an la tawh a, Ligue 1-ah positive case pawh an tlem hle.
Germany
Bundesliga-ah player zinga 94% in vaccine dose hnih an la tawh a, Bayern Munich midfielder Joshua Kimmich chuan November thla khan Covid-19 a kai a, vaccine a lak hma loh avanga a inchhir thu a sawi.
Spain
La Liga player zinga 90% aia tamin vaccine dose hnih an la tawh a, stadium khatin inkhel en an la phal bawk.