Premier League Thlirlawkna (Thawh hnihna)

Pep Guardiola naute tan Premier League-a champion beisei chi a ni tawh lo a, hei vang hian an tha an thlah dawn tihna erawh a ni lo ang. 

Chutihrual chuan Pep-a team-te hian Champions League leh FA Cup-ah beisei an la nei a, Premier League fixture a hautak dawn bawk si avangin Pep-a'n a squad a siksawi viau ṭhinin a rinawm. 

City ṭantute tana thu hriat nuam a awm a, Covid-19 vanga chawlh lailawk a nih chhungin defender pawimawh Aymeric Laporte a dam chiang hman a, Laporte-a dinhmun hian City tlarhnung dinhmun thui takin a hril. 

Kevin De Bruyne a dam ṭhat chuan City tan midfield-ah lungphanna tur a awm lo a, Belgian midfielder hi City game siamtu ber a ni. Chutihrual chuan Manchester derby-a chesual goalkeeper Ederson-a'n insiamṭhat a mamawh a, lockdown chhungin a lo insiamṭha hman tura ngaih a ni. 

Covid-19 vanga chawlh laiin Pep Guardiola-a'n coronavirus do nan an ram Spain lamah euro maktaduai khat a thawh a, Etihad Stadium chu NHS-ten an hman turin thawh a ni bawk.

Covid-19 vanga league chawlh lailawk a nih hma lawk khan Manchester derby-ah an hmelma kumhlun City an hneh a, Europa League quarterfinal lut turin LASK chu khualmualah 5-0 ngawtin an va sawp bawk - mahse an phur vanglai takin inkhel tihtawp a ni a, Red Devils fan-ten an team inkhel en an châk leh tawh khawp ang. 

Kum 2020-a United-in harhna an chan theih nan January-a an lakluh Bruno Fernandes chu player pawimawh a ni a, Paul Pogba nen an inkawp theih tawh dawn avangin en an châkawm lehzual. Chutihrual chuan player pahnih inkawp chung hian West Brom chu friendly match-ah an hneh lo. 

Premier League chawlh laia midangte ṭanpui nana pound maktaduai 20 tuak ngahtu Marcus Rashford-a'n khelmual pawn lamah fak a hlawh viau a, a hliam pawhin dam lam a pan ṭan. Hetihrual hian June 19 zana Tottenham Hotspur an lenchilh huna inlan tur khawp erawhin a dam hman lo ang. 

United hian point thum lekin palina Chelsea an phak lo mek a, season thara Champions League khelh phak chu an tum tur a ni - hei hi coach  Ole Gunnar Solskjær pawhin a hna humhimna tur a ni tih a hrechiang khawpin a rinawm.

Table-ah 13-na niin point 35 an nei mek a, Premier League chawlhlawk laiin Saudi Arabia Public Investment Fund lamin lei an tum avangin thawm an nei ring hle - tun thlengin inlei felna erawh a la thleng lo. 

Tlarhnung ban rinawm goalkeeper Martin Dubravka chu a hliam a dam leh tawh a, a inkhelh aia a chawlh hahdam hun tam zawk Andy Carroll pawh inkhel turin a inpeih ve leh tawh! Kum 23 mi Allan Saint-Maximin pawh lockdown laiin a dam fel hman a, Magpies tan chanchin ṭha a ni. 

Magpies hian season thara Premier League khel tur chuan an fimkhur a ṭul dawn a, coach Steve Bruce hian fixture hautak karah player hman dan a thiam a ṭul dawn - he team hian FA Cup quarterfinal an lut tawh bawk. 

Chutihrual chuan club hralh fel theih loh leh rawlthar duhawm Matty Longstaff-a contract fel thei lote hian team boruak a bawh buai reng a nih chuan result a nghawng ang tih a chiang a, Magpies players tan tuna pawimawh ber chu rilru 'lam' a ni.

February 29 zan khan Norwich City chuan 1-0 in Leicester City an hneh a, tun season-a league-a vawi nga an chakna chiah a ni - Premier League inhamtang tur chuan an match hmabak pakuaah vawi nga tal chak leh an mamawh dawn. 

Match 29 an khelh tawha vawi nga chiah chak thei team tan match kua aṭanga vawi nga chak chu thil harsa tak a ni dawn tih a lang chiang reng a, an hmabak a ko hle.

Norwich boss Daniel Farke chuan Foxes an hneh hnu lawk khan, "Thilmak kan mamawh tel dawn a ni," tiin league-a inhamtan chungchang a lo sawi tawh a, mahse tlarhnungah Timm Klose, Christoph Zimmermann, Grant Hanley leh Godfrey te an dam kim vek tak avangin an goal chhuah nasat ṭhin chu zia tura beisei a ni. 

Hertha Berlin aṭanga loan-a an hawh Ondrej Duda chu a la cham thei dawn a, striker Teemu Pukki-a'n hliam neuh neuh a neih hnuah chawlh hahdamna hun a neih tak bawk avangin a êng zawngin thil an thlir thei ang.

Tun season Premier League-a mipui barakhaihtu langsar chu Sheffield United an ni a, season hmasaa Championship khel team hian season thara Champions League khelh an beisei mek - FA Cup quarterfinal an lut tawh bawk. 

Sheffield hian lockdown hmaa an match hnuhnung 13-ah vawi hnih tlawm an nei a, an ngam loh hi Liverpool leh Manchester City an nih avangin hnual phahna tur an nei lo. 

Manchester United khawngaihna dawngin goalkeeper Dean Henderson chu season tawp thleng loan-in an hawh chhunzawm thei dawn a, player inhliam an neih miah loh avangin an ṭhat dan berin bul an ṭan 'thar' leh thei dawn. 

Sheffield tan an tum ram thleng turin goal ban karah Henderson a pawimawh zel dawn a, midfielder Oliver Norwood theihna sang tak hi an team hnuk kal turin a pawimawh viau bawk ang.

Ralph Hasenhuttl-a enkawl team hi Premier League chawlh a nih hma khan an match hnuhnung pangaah vawi li an tlawm a, table-ah 14-na ni mein tla mai thei dinhmunah an la ding.

Saints hian an match hnuhnung berah Magpies chu 1-0 in an ngam lo a, hemi hma chiaha an match-ah hian West Ham chu 3-1 in an ngam lo.  

Hammers laka an tlawm ṭum hian Hasenhuttl chuan an tlarhnung chu, "Fiamthu ang chauh an ni," tiin na takin a sawisel. Magpies lakah winger Moussa Djenepo chu hnawhchhuah zui a ni a, ani hian match thum a khel thei dawn lo. 

Saints tan Premier League-a inhamtang turin goalkeeper Alex McCarthy chet ṭhat a pawimawh dawn a, khawiah pawh chhawr theih James Ward-Prowse a ṭangkai dawn bawk. 

Sawi hmaih theih loh chu Danny Ings a ni a, English striker hian tun season-a league match 29-a khelhah goal 15 a khung tawh!

Jose Mourinho enkawl team tan chuan Covid-19 vanga chawlhlawk awm hi, "Ka dil loh zawk malsawmna," tih mai chi a ni - hliam vanga inlan tawh lo tura ngaih Harry Kane, Son Heung-min, Moussa Sissoko leh Steven Bergwijn-te an dam leh vek tawh a, an ṭhat dan berin Spurs an awm leh tawh. 

Hetihrual hian Giovani Lo Celso dinhmun a chiang lo a, Dele Alli chu match khat atan hrem a ni. Chutihrual chuan chhuanlam ngah ve ṭhin tak Jose tan chhuanlam neih a thiang tawh lo. 

January-a Bergwijn a lei khan Portuguese manager hian, "Han ngaihtuah ve mah teh u. Kane dam ṭha se, Son, Lucas Moura leh Erik Lamela bakah Bergwijn a awm bawk chuan kan ropui dawn a ni," tiin a lo sawi tawh a, he 'ropuina' hi fan-ten hmuh an beisei ang. 

Spurs hian Champions League khelh la beisei mah se table-ah pariatna an nih avangin palina nih ai chuan pangana nih a, Manchester City hremna chhawr ṭangkai chu an beisei zawk ang - June 19 zana Manchester United mikhualin bul an ṭan dawn.

Premier League-ah 17-na an ni mek a, an match hnuhnung berah Crystal Palace chu 1-0 in an ngam lo - hmabak a ko a, season thara Premier League khelh chhunzawm an duh chuan chetsual nawn a thiang tawh lo. 

May khan club captain Troy Deeney chuan a chhungte hriselna dinhmun a venthawn vangin club training a zawm duh lo a, a hnuah erawh a zawm leh tho. Hetihlai hian goalkeeper Ben Foster chuan kum hnih chhung atan contract thar a ziak. 

Watford hian coach thar Nigel Pearson an neih hnu lawkah Manchester United, Aston Villa, Wolves leh Bournemouth an hneh avangin an phur hman viau a, Liverpool chu rin loh takin 3-0 in an sawp bawk. 

Mahse, he team hian Bournemouth leh Liverpool an hneh inkarah league match vawi nga an khel a, chak an nei miah lo!

Hammers-in season duhawm lo tak hmangin an talbuai mek a, an league match hnuhnung pakuaah chak an nei miah lo - vawi ruk an tlawm a, vawi hnih an khingpui an inhnehtawkpui. 

West Ham hian an mual London Stadium-ah September hnu khan a zawna league match-a chak an la nei miah lo a, Premier League table-ah 16-na an ni mek. 

David Moyes-a naute hian Wolves (sixth), Tottenham (eighth), Chelsea (fourth) leh Manchester United (fifth) hmachhawn an la hmabak a, Premier League table-a 10-na chung lama awm team an hmachhawn an la hneh miah 

loh avangin hmabak a ko hle. 

Covid-19 vangin player-ten hlawh lak rih loh an remti a, manager David Moyes, vice-chairman Karren Brady leh finance director Andy Mollett te chuan an hlawh 30% in an tihniam bawk.

Premier League-a parukna dinhmun hauh mek team hian season thara European football khelh an tum ngam a, league chawlh a nih hmaa an match hnuhnung berah Brighton chu goal khung loin an inhnehtawkpui thung. 

Wolves tan hian Raul Jimenez bawk chu player pawimawh a ni leh dawn a, Mexican striker hian goal 13 a khung tawh. Wolves hi Europa League-ah an la dam bawk a, team tawh khirh ber pawl an la ni mek. 

Nuno Espirito Santo enkawl team hian lockdown laiin chanchin lawmawm lo an nei a, Italian club Fiorentina-a loan hmanga an khelhtir forward Patrick Cutrone chuan March khan Covid-19 a kai. 

Wolves hian June 20 zanah West Ham lenchilhin bul an ṭan ṭha leh dawn a, team en châkawm ber pawl an la ni reng.