Top flight football-ah derby en châkawm ; Electric Veng Vs Chanmari

Ṭhangthar tam takin Chanmari hi tun hnua inkhel thiam veng chauh emaw an tih chuan an hresual tihna a ni a, anni hi tun hmaa inkhelh thiam veng an ni. Mizoram Premier League awm hnuah Chanmari FC an vul a, vawiin tlai dar 2:00 hian Electric Veng FC an hmachhawn dawn. Anni pawh hi football-a sulhnu nei ṭha veng an ni a, MPL-ah erawh club thar an ni thung.

LG Independence Cup-ah Chanmari FC leh Electric Veng ten hnehna an chang ve ve tawh a, chuvangin vawiin tlaia an inkhel tur hi a pawimawh. MPL club thar Electric Veng hian an match hmasa berah I League club Aizawl FC hneh mah se semifinal lut tur chuan kawng a la thui hle.

1989 Final
Tualchhung football inelna ngaihhlut CYMA football-ah Electric Veng-in 1989 final-ah Chanmari 2-1 in an hneh a, an champion. Electric Veng hi 1989 bakah hian 1997 leh 1998-ah an champion a, 2010 khan Red Ribbon Football-ah champion-in sial an kai haw bawk.

Chanmari hian Electric Veng an hneh loh hnuah final lut nawn mah se Dinthar hneh loin pahnihna an ni. Amaherawhchu kum 2012 khan Chanmari hian Red Ribbon Football-ah Durtlang hnehin a champion a, MPL ṭan kum a nih bawk avangin he nomawi hi tun dinhmun an thlen theihna tura cho phurtu a ni.

Hmanlai hian maw...
Aizawla football star chu Pa Dinga (L) leh DVA (Dr Ngurdingliana, MLA) te an ni a, Aizawl FC dintu leh khaipa niin ṭhian hnai tak an ni.

Nimahsela Pa Dinga chu Electric Veng fapa rangkachak a ni a, DVA chu Chanmari football thiampuipa a ni a, Electric Veng leh Chanmari inkhel turah chuan 'hmelma' an ni a, ṭhian an ni thei tawh lo.

Tunah hian a boruak a dang ta deuh a nih pawhin veng pahnih football 'rivalry' hre phak chin tán Electric Veng leh Chanmari inkhel tur a nih miau avangin a boruak a hniam thei lo.

Vawiin LG Independence Cup inkhel tur hi thangtharte tán chuan inkhel naran a ni mai thei a, Mizo tualchhung football ngaina tán chuan 'historic match' a ni a, 1980's aṭanga football rivalry awm tawh kha India rama kan champion theih hnuah top flight football ah an intawng dâwn.

Tunah chuan...
Chanmari FC-in MPL nomawi ṭum hnih an chawi tawh a, season liam ta erawh champion-na an nei lo. Kumin hian champion ngei tumin coach Lalruatliana Sailo (Tawia) hoin squad an inthuam ṭha a, tualchhung player nei ṭha ber ang hiala sawi theih an ni.

Chanmari hian goal khung turin Laldampuia, Lalmuanzova, Vanlalbiaa Chhangte leh Ṭhasiama te an kawl a, position tinah MPL tawnhriat nei ṭha an kawl vek bawk avangin Electric Veng lakah pawh team ṭha zawk turah an ngaih theih ang.

Electric Vengin bul an ṭan fuh a, MFA Super Cup an khelh loh avangin team dang zawng aiin inelna hmachhawn turin thathona an nei a, ṭantu an nei ṭha bawk.

Aizawl FC an hneh ṭumin keeper Lalrinnunga Hnamte a khel ṭha a, left back-a football career ṭan David Lalchhuanawma pawh a position thar tlarhma lamah a tal na hle. Salem Veng tlangval David-a hian a club hlui a hmachhawn dawn.

Mipui an pawimawh
Chanmari FC-in ṭantu an nei ṭha ṭhin a, Electric Veng an hmachhawn dawn avangin tlai inkhel mah ni se an ṭha turah a ngaih theih.

Chanmarians hian au hla ṭha tak tak an nei a, top flight football-a Electric Veng FC an hmachhawn vawi khatna hi ni chhinchhiahtlak a nih theih nan supporter-te'n a hlutna an belhchhah a ṭul a ni.

Electric Veng erawh mumang ramah an cheng mek a, an match hmasa bera I League club an hneh avangin an phur vanglai tak tia sawi theih a ni. Electric Veng manager Lalchhanhima chuan, "Point thum hmuh tumin kan khel dawn a, a chhe berah point khat hmuh kan inbeisei," tiin inringtawk takin Vanglaini a hrilh.

Mipui chungchang sawi zuiin Chhanchhana chuan, "Media cell kan nei a, hma an la ṭha a, tualchhung football hi veng chhung titi ber a ni tawh. Chanmari FC nen pawh hian ṭantu kan neih ṭhat ngei ka ring," tiin player 12-na pawh an inpeih thu a sawi.

Group A
27 July, Zirtawpni
Chanmari FC 2–0 Bethlehem VT FC
CFC : Laldampuia 28'; Lalrammuana 90+1'
MoM: R. Lalawmpuia, CFC
Aizawl FC 1–2 Electric Veng FC
AFC : Lalkhawpuimawia 85'
EFC : Isak Vanlalpeka 18'; Vanlalhmangaiha 27'
MoM : Lalrinnunga Hnamte, EFC
Vawiin inkhel tur
2:00 PM Electric Veng FC Vs Chanmari FC
7:00 PM Bethlehem VT Vs Ramhlun North
2 August, Ningani
2:00 PM Ramhlun North Vs Electric Veng FC
7:00 PM Chanmari FC Vs Aizawl FC
4 August, Inrinni
2:00 PM Aizawl FC Vs Ramhlun North
7:00 PM Electric Veng FC Vs Bethlehem VT
7 August, Thawhlehni
2:00 PM Bethlehem VT Vs Aizawl FC
7:00 PM Ramhlun North Vs Chanmari FC