Ronaldo-a'n Turin a thleng

Pound maktaduai 88-a Juventus pantu Cristiano Ronaldo chuan a club thar training zawm turin Turin khawpui a thleng a, airport-ah fans engemaw zatin an player thar hi lo hmuakin nimin khan training a zawm nghal.

Kum 33 mi forward hian World Cup a khelh chauh avangin chawlh pek rei bik a ni a, hemi piah lamah hian sumdawnna thil buaipuia China lama hun a hman avangin a club thar hi a zawm lawk lo bawk.

Portugal tan vawi 154 inlana goal 85 khung thei hian mimal chawimawina dawn theih ang zawng zawng chu a dawng kim tawh a, season hmasa khan a career-a a vawi nga nan Champions League nomawi a chawi.

Real-ah season kua hun a hman chhungin match 438 a khel a, goal 450 a khung. Season hman zawh takah match 44 khelin goal 44 a khung a, a kum tam tawh mah se Juventus tan player pawimawh tak a nih theih beisei a ni.