Zaninah Bethlehem Vengthlang leh Ramhlun North

LG Independence Cup-ah zanin hian Ramhlun North an inlan ṭan dawn a, dar 7:00-ah Bethlehem Vengthlang FC nen an inhmachhawn ang.

BVT hian an match hmasa berah Chanmari FC chu 2-0 in an hneh lo a, Ramhlun North laka point an hmu lo a nih chuan semifinal beisei a harsa tawh ang.

Group A-ah team ṭha Chanmari FC leh Aizawl FC an awm a, team nem tura ngaih Electric Vengin point thum a hmuh bawk avangin Ramhlun North tan knockout stage thleng pha turin point thum hlawhchhuah hman a ṭul.

Ramhlun North an ṭha

Ramhlun North-in MPL khel turin player 20 an ziak lut a, an squad chhah lo mah se starting eleven erawh an ṭha ṭheh ṭhawh hle. Tlarhma lamah pawh winger hmuhnawm Laldingngheta te an kawl a, BVT tlangval hi an veng club tan chuan dan a harsa ang.

Tualchhung striker hmuhnawm ber zinga mi Lalliansanga (Notea) leh Khawzawl tlangval Vanlallawma te chu Ramhlun North tlarhmaah an awm bawk a, midfield-ah K. Lalnunzama leh Joseph Lalnunpuia te an kawl bawk avangin champion thei zinga mi an ni.

Tlarhnungah MS.Dawngzela leh Lalfelpuia te an inkawptir thei a, mual sira awm turin Lalmawizuala leh Lalmuanawma te an awm a, goalkeeper Liansangpuia an neih bawk avangin paltlang an harsa dawn. An squad thlirin BVT lakah Ramhlun North hi chak tura ngaih an ni.

BVT hi le

Bethlehem Vengthlangin squad-in enin chhuan tur an nei hran lo a, amaherawhchu Chanmari FC laka an khelh dan thlir chuan MPL best defender ni tawh H. Lalhlimpuia khelhna team hian Ramhlun North an dan theih lohna chhan tur a awm lo.

Tun ṭumah hian keeper Eddie Zorammawia leh winger Lalnunsanga te inhliam vangin an chhawr theih a rinawm lo a, chanchin hriat nuam a ni lo. Coach Benjamin Lalhriatpuia chuan, "Semifinal thlen kan duh a nih chuan chak tumin khelh a ṭul a, chuvangin beisei kan la neih chhung chuan chak tumin kan khel ang," tiin chak tuma an khelh tur thu Vanglaini a hrilh.