Tour de France pakhatna Geraint Thomas

Chawlhkar thum zet 3,351 km an tlan hnuah Welsh cyclist Geraint Thomas chu Tour de France-ah pakhatna a ni a. Inelna hnuhnung pasarihah British rider-in pakhatna dinhmun ṭum ruk an hauh a, Thomas tan tun ṭum hi yellow jersey nen a tawp a khar vawi khatna a ni.

Intlansiakna hau tak

July 7-29 inkar khan khawvela cycle intlansiak ropui beraa ngaih hi tlan a ni a, France ram an hel chhuak a ni ber a, Spain ram tlem an hrut tel bawk.

Inelna hi stage 21-ah ṭhenhran a ni a, a thui zawng erawh a inlang lo thluah. State tawp ber hi Paris khawpuia an khawthler chhuanvawr Champs-Élysées-ah an tlan a, hei hian inelna hlutna nasa takin belh a ni.

Thomas a dingchang

Kum 32 mi Geraint Thomas chuan Dutch rider Tom Domoulin lakah minute 1 leh second 51 laia a falin pakhatna dinhmun a hauh a, vawi li champion tawh Chris Froome chuan pathumna dinhmun a rawn hauh ve bawk.

Kum 2012 khan British mi Bradley Wiggins chuan Great Britain ram cylist zinga a hmasa ber ni turin Tour de France-ah pakhatna a ni a, hemi hnu hian Froome rawn langin kum 2014-a Italian rider Vicenzo Nibali a rawn lak ze zawk tih loh chu British mi vekin pakhatna dinhmmun an hauh.

Thomas chuan, "Kum 2007 khan Champs-Elysees pheiah hian a vawi khat nan ka tlan a, a tawp zo ve tur hrim hrim ka tlan a, a nawm dan chu mak danglam tak a ni. Tun ṭumah erawh pakhatna ni turin ka tlan phei ta kha a ni a, suangtuahna khawvelah ka leng dalh dalh ni berin ka hria," tiin a lawm thu chu thiam takin a sawi.

Lawmman dang

Stage hrang hrangah a tawp kharna stage 21 an ngai hlu a, Norweigian rider Alexander Kristoff chuan meter 200 vel tlan tur a la awm tih aṭangin chak mangkhengin a rawn nawr a, pakhatna dinhmun a rawn hauh a; German rider John Degenkolb a rawn lehthal chu a pui hle.

Tour de France-ah hian lawmman hi chi hrang hrang a sem darh a ni a, point hmu tam ber lawmman (green jersey) chu world champion vawi thum ni tawh Slovak rider Peter Sagan chuan a he dawng a, he lawmman hi vawi ruk a dawnna a ni a, German Erik Zabel-a record a rawn tluk pha chiah bawk.

King of the moutains an tih mai polka dot jersey chu khawtual rider Julian Alaphilippe-a'n a chang a, a vawi khat nihna chauh a ni. French rider dang Pierre Latour chu kum 26 hnuai lam zinga che ber niin white jersey a chang thung.