A vawi ruk nan Hamilton a chak

Lewis Hamilton chuan a vawi ruk nan Hungarian Grand Prix-ah hnehna a chang a, driver championship lama a elpui Sebastian Vettel chu pahnihnaah thelng mah se, Mercedes driver hian point 213 a hmuh tak avangin an inkarah point 24 ngawt a awm tawh.

Mercedes driver pakhat zawk Valtteri Bottas-a'n intlan­siak tlan ṭha viau mah se Vettel bakah Daniel Ricciardo nen an in bakkaih palh a, pangana a ni hram. Ferrari driver Kimi Raik­konen chu pathumnaah thlengin podium a lawn phak thung.

Lewis a fawr

Pathianni zan Hungaroring-a intlansiakah pole position

aṭanga bul ṭantu Hamilton a tlan ṭha leh hle a, British driver hi tun hnai chhoah chuan elphak an awm meuh lo. Qualifier lama an chet ṭhat avangin Hamilton leh Bottan ten a tirah Mercedes chu hma an hruaipui.

Tlan kawng a ro ṭhat avang­in Ferrari an zam bik lo a, ruah a sur loh hi chuan ṭum dangah pawh an chet fuh tawh ṭhinna a ni. A tir lamah Vettel-a'n a teammate Raikkonen tlan pelin pathumna dinhmun a luah, German driver hian na takin nawr mah se intlansiak hnuhnung zawka a tihsual ang a thlen nawn a hlau niin a lang, nidanga Hamilton nen an inum na tak ang hmuh tur a tam lo.

World champion vawi li ni tawh Hamilton-a'n Germany leh Hungary-ah hnehna a chan theih avangin a nomawi kawl lai humhim turin a dinhmun a sawh­nghet chho mek a, season chanve an hman zawh tawh chinah vawi nga hnehna chang tawhin ani ai chak hnem an awm lo.

A chanve zo

Kumin chhungin Formula 1 intlansiak hi vawi 21 neih tur a ni dawn a, heng zinga 12 chu an zo tawh - tlan hmabak pakua a la awm tihna a ni. Tunah hian chawlh an nei zui dawn a, an intlansiak lehna hmasa ber tur chu Belgian Grand Prix niin, inelna hi September 24-a neih leh tur chauh a ni ang.

Kum 33 mi Hamilton chuan, "Ni nuam leh hlimawm tak a ni, kan thawhhona ṭha leh thawhrimna nasa tak kha a lawmawm. Kan team khan thil tum kan nei a, chumi ti hlawhtling thei tur chuan chak takin hma kan la mek a, kan zavai thawhrah a ni a, chona hautak chu kan paltlang zan a ni," tiin team thawhrah sengtu a nih thu a sawi.

Car intlansiakna sang leh ngaihhlut berah hian Hamilton leh Vettel an inel na chho hle a, driver dang tan tun hnaiah nomawi chawi vena hun a awm meuh lo. World champion vawi li ni tawh pahnih hi tun season chawhnu lamah pawh a inel na ber an ni leh ang.

Hungarian Grand Prix Results
# Driver Team
1 Lewis Hamilton Mercedes
2 Sebastian Vettel Ferrari
3 Kimi Raikkonen Ferrari
4 Daniel Ricciardo Red Bull
5 Valtteri Bottas Mercedes
6 Pierre Gasly Toro Rosso
7 Kevin Magnussen Haas
8 Fernando Alonso McLaren
9 Carlos Sainz Renault
10 Romain Grosjean Haas
F1 Drivers' standings
# Driver Points
1 Lewis Hamilton 213
2 Sebastian Vettel 189
3 Kimi Raikkonen 146
4 Valtteri Bottas 132
5 Daniel Ricciardo 118
6 Max Verstappen 105
7 Nico Hulkenberg 52
8 Kevin Magnussen 45
9 Fernando Alonso 44
10 Sergio Perez 30