Prannoy-a'n second round a lut

World Badminton Championship 2018 chu nimin aṭang khan Nangjingm, China-ah khelh ṭan a ni a, Indian shuttler HS Prannoy chuan Abhinav Manota hnehin harsa lo takin second round a inhlangkai.

World number 11 Prannoy hian hnehna chang turin hun a mamawh rei lo, New Zealnd tlangval lakah hian minute 28 chhung lekin 21-12, 21-11 in a chak. Kum 26 mi India tlangval hian a match lehpekah chuan Ygor Coelho a hmachhawn leh ang. Brazilian shuttler hian Wong Wing Ki Vincent lakah 22-20, 19-21, 11-4 in hnehna a lo chang ve bawk a ni.

Nimina Indian shut­tler dang inkhelah mipa doubles pair Manu Attri leh B Sumeeth Reddy te chuan Bulgarian tlangval pahnih Daniel Nikolov leh Ivan Rusev te ṭangdun chu 21-13, 21-18 in an hneh ve bawk. Hmeichhe lamah erawh Indian shuttler an vanduai, Sanyogita Ghorpade leh Prajakta Sawant chu Bengisu Ercetin leh Nazlican Inci te lakah minute 34 chhungin 20-22, 14-21 a an chak loh avangin an zinkawng a tawp.

India tan hian Olym­pic medal la tawh pahnih Saina Nehwal leh PV Sindhu bakah, mipa singles world number 2 hlui Kidambi Srikanth te pawh inelna hmachhawn turin an feh chhuak a, he thu buatsaih lai hian an result kan hre ve hman lo.

Inelna ṭan ni hian inkhel ngaihnawm a awm nghal, mipa singles-ah world number 1 hlui Lin Dan chuan minute 49 chhungin Mark Caljouw lakah 21-14, 21-14 in hnehna a chang a, a vawi ruk nan champion a tum dawn. Seeded pakhatna leh champion lai ni bawk Viktor Axelsen pawhin 21-8, 21-7 in Duarte Nuno Anjo a sawp ve bawk.