US nek chhuaktu India

India nula hockey khel thiam ten United States lakah an mamawh zat goal an vaw lut thei a, Mizo nula Lalremsiami Hmar telna India hi US nen 1-1 a an inhnehtawk hnuin Pool B-ah pathumna an ni a; 2018 Women's Hockey World Cup khelh laiah knock out stage an inhlangkai.

Zanin dar 10:30 hian India leh Italy ten quarterfinal lut tur zawk an zawng leh dawn a, a chak zawk hian August 2 zanah Pool B hmahruaitu ni chunga tlang Ireland an hmachhawn leh dawn a ni. Inkhel hi Star Sports 2 SD leh HD-ah en theih a ni ang.

Hockey World Cup khel ram 16 te hi group paliah ṭhen an ni a, an inkhelh kual hnuah a sang ber Netherlands, Australia, Ireland leh Germany ten quarterfinal an lut nghal a, pahnihna leh pathumna ten playoff hmangin hmunruak pali la awm chu an hnawhkhat dawn a ni – inelna hi August 5 hian zawh tur a ni.

Rani goal a tawk

Pool match hnuhnung ber an khelh hmain India hi pathumna an ni sa a, an khingpui US hi palina an ni thung. An inhnehtawk a nih chuan India an tlang ang a, US an tla thung ang; US tan tlang turin chak ngei ngei a ngai tihna a ni.

Lee Valley Hockey Centre-ah India lamin bul an ṭan fuh zawk, minute sarihnaah penalty corner an hmu nghal; mahse an match hmasa ang bawkin an chhawr ṭangkai thei lo. Minute 11-naah US lamin na takin an nawr let a, world number 7 tan Margaux Paolino chuan goal hmahruai khungin an ram chu dinhmun duhawmah a dinpui.

Chawlhlawk an hman thlengin India lamin a chhanletna an nei thei lo, Kolasib nula Siami pawhin inkhel bul ṭan mah se tournament danga a khelh angin goal hmaah a la vannei tawk bik lo – US lakah khelmualah hun a hmang tam tawk lo deuh bawk.

Second half an ṭan chiah a, India lamin penalty corner an hmu leh nghal. Captain Rani Rampal chuan American keeper Jackie Briggs tana dan harsa tawk tur chiahin a khup zawn velah a thlawh phei a, dan hman lohin a goal. Ram tana match 217 khel tawh Rani ball vuak ang hi player tam takin tih an harsat a ni, hun pawimawhah mi danglam bik a nihna a lantir.

India lamin inkhel an thunun zui a, minute 47 an khelh tlin meuh chuan penalty corner pawh vawi ruk an hmu hman. Mahse, US tan Briggs a dingnghet tlat a, defender Gurjit Kaur vuak luh tur pawh ropui takin a dan sak–goal dang a lut zui lo a, India an hlim laiin rinkai ni chunga inelna bul ṭan US erawh an zingkawng a tawp.

India vs Italy

2017 Hockey Asia Cup champion ni chunga World Cup khel India hi an match hmasa berah a thlengtu England nen 1-1 in an inhnehtawk a, match hnihnaah Ireland chu si khat faiin an ngam lo–US laka point khat an hmuh vanga tlang thei chauh an ni.

Zanina an hmachhawn tur Italy hi 2016-17 FIH Hockey World League semifinal an khelh vanga England pan thei an ni thung a, Pool A-ah awmin China leh South Korea te hnehin point ruk an hmu thei. Mahse, world number 1 leh champion tura rinkai ni bawk Netherlands chu 12-1 ngawtin an ngam lo, pahnihna niin playoff an khelh a ngai.

Italy hian an match hmasa pahnihah goal li khungin an lamah a lut lo. Amaherawhchu, Dutch team lakah an zawr hneh hle a, India tan sut tlang theih loh tur khawp a chhah an ni bik lo. World ranking a ṭanga thlir chuan India hi 10-na niin an sang zawk a, Italy hi 17-na niin tun World Cup khel zinga hniam ber an ni thung.

Pool match thum an khelh tawhah India tlarhnung an dingkhawng thei viau, team

ṭha England leh US lakah pawh an nghing tam lo. An mamawh chu goal khung thei a ni. Mizo nula Siami chuan, "Rani hi player danglam bik a ni a, tawnhriat a ngah tawh avangin kan team tan a ṭangkai hle," tiin Vanglaini a hrilh tawh.

India team zinga naupang ber Siami leh ram tana match khel hnem ber Rani inkawp hian tournament danga an tih tawh angin, Italy lakah India mipui hlimna an thlen thei ang em tih chu zaninah chhanna pekin a awm dawn.