Harh tharna chang Sturridge

USA-a tour neia zin mek Liverpool tan Daniel Sturridge a che ṭha a, hliam vanga khelmual pawn lama a hun tam zawk hmang striker hian nipui pre-season match-ah goal li a khung tawh.

Manchester United nena an inkhelah pawh England striker hian a 'class' pholangin goal ṭha bik a khung a, man of the match-ah thlan a ni bawk – a dam ṭhat chuan player hlauhawm tak a la ni reng tih a pholang.

Season hman zawh takah khan Sturridge hian loan-in West Brom-ah hun a hmang a, mahse Baggies lamah pawh hliam vang bawka buai chhunzawmin league match ruk chiah a khel a, goal a khung lo.

Sturridge chuan, "Baggies ka pan kha inchhirna engmah ka nei lo a, ka tawnhriat khan nasa takin min pui a ni," tiin a sawi a, a hun tawnah a lawm thu a sawi.

Liverpool hian tlarhmaah Mohamed Salah, Sadio Mane leh Roberto Firmino an neih avangin Sturridge tan hmun chan a harsa dawn tih a hriat a, mahse hliamin a tibuai chunga Liverpool tan league match 98-a goal 48 khung thei striker hian a huphurh lo.

Sturridge chuan, "Chak duhin ka tuihal reng a, hei hi chu engtikahmah a inthlak lo ang. Ngai ka awh chhoh leh tak avangin nuam ka ti a, mahse kei chauh niloin team pumpui pawh an thawkrim em em a ni," a ti.

Liverpool boss Jurgen Klopp chuan English striker hi a dam ṭhat phawt chuan a ruahmannaah a tel tur thu a sawi tawh. Reds hian training nei turin France an pan dawn a, pound maktaduai 66.8 man goalkeeper Alisson Becker, Firmino leh Trent Alexander-Arnold ten an zawm ve tawh ang.