Whyte-a'n Wilder hmachhawn mai thei

Pathianni zinga O2 Arena, London khawpuia inhneka Joseph Parker hnehtu Dillian Whyte chu WBC heavyweight champion Deontay Wilder hnek thei dinhmunah a ding mek a, Whyte promoter Eddie Hearn chuan boxer pahnih inhmachhawn theih nan ruahmanna an kalpui tur thu a sawi.

Hearn chuan, "Dillian Whyte hi Wilder hma-chhawn turin ka duh a ni. Wilder hian November-ah inhnekpui tur a la nei lo a, Whyte erawh November emaw December-ah a inhnek a ngai thung," tiin boxing pahnih hun tawn chu a fuh theih thu a sawi.

Boxing promoter lar Eddie Hearn chuan sawi zawmin, "Boxer pahnih hi inhmachhawn ngei se ka duh. Wilder hian UK-a lo kal a hreh a, chuti a nih chuan USA-ah an inhnek mai ang. Inbiakna hmasaah dollar maktaduai nga vel ka chhawp chhuak tawh a, dollar maktaduai riat velin kan sawm leh dawn a ni," tiin boxer pahnih chu inhmachhawn tir a tum ruh hle.