United an buai? Mourinho leh Ed Wood thu a inhmu lo

USA-a tour nei mek Manchester United manager Jose Mourinho-a'n ngaihven a hlawh a, Portuguese manager-in ngaihven a hlawh chhan hi ṭum dang ang bawkin a 'ṭawng tam' vang a ni.

Mourinho hian Liverpool nena an inkhelh ṭumin pre-season chu thil holam mai a nih thu a sawi a, hetihrual hian club transfer chungchang a sawi lang bawk.

Chelsea boss hlui hian, "Player pahnih lak belh ka la duh a, mahse player pahnih lak hi chu ka theih ka ring lo. Pakhatah lungawi ka zir a ṭul ang," a ti a, United thuneitu lam aṭangin a transfer duhdan daltu an awm niin a lang.

United hian Nilaini zing dar 5:35-ah an pre-season tour-a match hnuhnung ber an khel tawh dawn a, European champion Real Madrid nen an intawng ang.

United leh bazar

Mourinho-a'n nipui transfer-ah Brazil midfielder Fred, Portuguese right back Diogo Dalot leh reserve goalkeeper Lee Grant te a lalut tawh a, a pawisa insen zat hi pound maktaduai 70 bawr vel a ni.

Portuguese manager hian Leicester City defender Harry Maguire leh Barcelona defender Yerry Mina lakluh a la duh niin an sawi a, mahse hei hi Red Devils executive vice-chairman Ed Woodward chuan a remti lo.

United hian pound maktaduai 65-in Maguire an beisei mek a, hei hi an chang a nih chuan Ed Wood-a'n pawisa dang thehchhuah a tum tawh lo–Mourinho hi player pakhat aia tam lak belh a la duh a nih chuan a neih sa aṭanga sum siam turin a ti.

Player panga

Mourinho-a'n nipui transfer ṭan hma khan United hotute hnenah player lakluh a duh panga hming a thlen tawh. Real Madrid boss hlui chuan, "Club hnenah ka player duh panga hming ka thlen tawh a, tuna ka nghah chu ka duh player-te hi ka nei thei ang em tih hi a ni.

"Heng ka player duhte hi kan lalut thei a nih chuan a ṭha a ni mai a, kan lalut thei lo a nih pawhin a pawina a awm chuang lo. Theihtawp kan chhuah ang a, ka player neihsa hman thiam ka zir mai ang," a ti.

Mourinho-a'n a player neihsa hman thiam zir a tum thu sawi mah se, vantlang hriatah a duh dana transfer an kalpui loh thu a sawi avangin a lungawi lo tih a hriat a, Old Trafford boruak a fuh lo tih hai rual a ni lo.

Martial out?

Mourinho-a'n player neih belh a duh chuan player hralh ṭhen a ngai tih a chiang tawh a, tun dinhmuna United-a derthawng ber chu Anthony Martial a ni – French forward hi Portuguese manager hnuaiah a tla tlum lo a, World Cup-ah pawh France aiawh turin koh a nih loh phah.

French media lam chuan United hian Paris Saint-Germain hnenah United hian Martial hi an zawrh niin an sawi a, mahse Mourinho-a'n a chhiar zat pound maktaduai 71 chu mi player 'duh loh' lei nan to an ti–kar khatah £150,000 a hlawh mek bawk.

Hriatreng atana ṭha erawh transfer bazar lai a nih miau avangin thu lengvak a tam a, thudik tak hriatchian a harsa – Martial hian United a chhuahsan kher lo ve thei bawk. Thil chiang tak awm erawh Mourinho a lungawi lo a, transfer bazar-a United chet zel dan tur a chiang lo tih hi a ni.