India U17 sawiseltu Constantine
FIFA Under 17 World Cup-a India team chu India coach Stephen Constantine chuan a sawisel. English coach chuan, "India U17 chungchang kan sawi reng chhan hi ka hrethiam lo.
"World Cup kha tlin vanga khel an ni lo a, inelna thlengtu an nih avang chauha khel an ni. Match thum khelh tur awmah an tlawm vek a, group stage-ah an zinkawng a tawp. I League-ah team kan din sak leh a, chutah pawh a tawp ber nichungin season an khar a ni," tiin a sawi.
India senior team hi SAFF Championship 2018 khel turin an inbuatsaih mek a, inelna hi September 4-ah neih ṭan tur niin Constantine hian hemi atan hian media kawmna neiin Asian Games-a an kal phal sak an ni lo chu a sawisel bawk.
English coach chuan, "Indian Olympic Association (IOA)-in Asian Games-a kan tel remti loa thutlukna an siam hi ka hrethiam thei lo. Asian Games-ah hian inlan ngat ila chu last 16 kan luh ngei rinna nghet tak ka nei a, team ṭha tak tak hmachhawnna remchang a nih bawk avangin ka ui takzet a ni. Kum li emaw kum riat liam taa India team kha kan ni tawh lo," tiin Blue Tigers chuan hma an sawn nasat thu a sawi.
Rwanda boss hlui chuan India hmachhawp sawi nghalin, "October-ah China kan hmachhawn dawn a, December 27-ah Oman nen kan inkhel leh bawk ang. November-ah pawh match kan nei dawn a, kan khingpui tur hi tihchian a la nih loh avangin hei erawh ka sawi thei lo," a ti a, Asian Cup 2019 khel tura an inpuahchah nasat thu a sawi.
SAFF Championship-ah hian India hi Group B-ah Sri Lanka leh Maldives nen awmin a sang pahnihin semifinal an lut dawn a, senior player langsar Sunil Chhetri leh Jeje Lalpekhlua te chu chawlh hahdamna hun pek niin naupang rual koh an ni. Mizo tlangval Lalruatthara, Jerry Lalrinzuala, Daniel Lalhlimpuia, Lallianzuala Chhangte leh Isaac Vanmalsawma te chu koh zingah an tel thung.
Player hi 34 koh phawt an ni a, koh zingah hian Bengaluru FC player pahnih Nishu Kumar leh Udanta Singh te chu tel mah se AFC Cup an khelh avangin India camp an zawm ve thei lo.
India Squad
GOALKEEPERS: Vishal Kaith, Kabir Thaufiq, Kamaljit Singh, Prabhsukhan Gill.
DEFENDERS: Nishu Kumar, Umesh Perambra, Davinder Singh, Chinglensana Singh, Salam Ranjan Singh, Sarthak Golui, Lalruatthara, Subhasish Bose, Jerry Lalrinzuala.
MIDFIELDERS: Vinit Rai, Germanpreet Singh, Anirudh Thapa, Rohit Kumar, Suresh Singh Wangjam, Arjun Jayaraj, Nikhil Poojari, Isaac Vanmalsawma, Nandha Kumar, Udanta Singh, Lallianzuala Chhangte, Ashique Kuruniyan, Vignesh D, Rahim Ali.
FORWARDS: Sumeet Passi, Daniel Lahlimpuia, Hitesh Sharma, Alen Deory, Manvir Singh, Kivi Zhimomi, Rahul KP.