Ribery-a'n a la duhkhawp lo

Franck Ribery leh Ar­jen Robben ten Ba­yern Munich tana an con­­tract neih laia an sea­son hnuhnung ber an hmang dawn a, France inter­national hlui hian hlawhtlina chi hrang hrang tawng tawh mah se a dang duhin an la tuihal reng thu a sawi.

Kum 35 mi Ribery hian Bundesliga-ah season 12 hun a hmang tling tawh dawn a, Dutch forward Rob­ben tan a season 10-na tur a ni tawh thung. Senior player pahnih hian league bakah German Cup leh League Cup te an chawi tawh.

Season thar thlirin Ribery chuan, "Player puitling kan ni tawh a, hlawhtlinna dang chan chak hian kan la tuihal reng a ni," a ti. Ribery hi hliamin bawh buai deuh ṭhin mah se season hmasa khan German champion tan hian league match 20 a la khel tling phak a ni.

Netherlands interna­tional hlui Robben pawhin kum liam ta khan league match 21 a khelh aṭangin goal nga a khung bakah assist vawi sarih a nei a, season tharah hian an dam a nih chuan match zawng zawngah inlan lo mah se player ṭangkai an la ni phak ang.

Kum 34 mi Robben chuan, "Ribery nen hian hun rei tak kan khel dun tawh a, nitin mai hian a nuam thar leh ṭhin. Kan kum a tam tawh a, kan tana pawi­mawh chu hliam nei loa hun hman tum a ni ang," a ti.