Haaland a inlan reng thei bik lo - Dortmund coach

Bundesliga-ah Borussia Dortmund chuan zanin dar 12:00 hian Mainz an mikhual dawn a, Lucien Favre hote hi Champions League khel turin tling tawh mah se pahnihna ni turin chak an la mamawh. 

Dortmund hian an match hnuhnung berah injury time-a Erling Braut Haland goal hmangin Fortuna Duesseldorf an hneh hram. Norway international Haaland hian league match 12-ah goal 11 a khung a, tun hnaiah erawh khup hliam vangin a inlan tam thei lo thung.

Lucien Favre chuan, "Kum 19 mi chauh a ni a, chau ve thei a ni. A la puitling lo a, a inzir chho mek. Dortmund a zawm hnuah ṭum hnih thum a inhliam tawh a, chuvangin a hma hun ngaihtuahin kan fimkhur a ngai a ni. Haaland-a enkawl dan tur kan duang a, player tam zawk tan kar khata match thum khelh hi a theih loh," tiin Haaland an chhawr reng loh tur thu a sawi.

Dortmund boss chuan sawi chhunzawmin, "Haaland hi ka mamawh a, a rilru put hmang hi ka duh zawng tak a ni bawk. Inkhelh a châk a, chak a duh a, a theihna tak tak thleng pha turin a inzir mek a ni," tiin a striker chungchang a sawi.

Borussia Dortmund khingpui tur Mainz 05 hi 15-naah awm mekin tla thei dinhmunah an la din avangin inkhel a awlsam dawn lo. Bundesliga inkhel dangah RB Leipzig chuan zan dar 12:00-ah Fortuna Dusseldorf an hmachhawn dawn a, Champions League khelh tum leh tlak hlau inkhel tur hi a hmuhnawm ang.