Champion turin Aizawl FC kan ṭha tawk - Yan Law
India rama club football inelna sang I League chu December 26 aṭangin Kolkata-ah khelh ṭan a ni dawn a, Aizawl FC coach Yan Law chuan champion tura an ṭhat tawk thu a sawi.
Tun season I League inelna hi Covid-19 vangin West Bengal-in a thleng dawn a, stadium pathum Mohun Bagan Ground (Kolkata), Kalyani Stadium (Kalyani) leh Naihati Stadium (Naihati) ah te khelh a ni ang.
Team 13
Tun season I League-ah hian team 13 an tel dawn a, season liam ta aiin team hnihin an tam zawk dawn. I League champion tawh Chennai City chuan dan an zawm theih loh avangin paih an ni a, an aiah qualifier-a pahnihna Kenkre dah luh an ni.
Rajasthan United chu qualifier-a champion chungin an inpet tling a, club thar dang Sreenidi Deccan FC an inlei tling bawk. Sreenidi Deccan FC hi sum hmanga inlei tling an nih avangin rawlthar ṭha rual dah khawmna Indian Arrows nen an relegate thei lo ang.
Round hmasa ber
I League match hmasa ber hi December 26, chawhnu dar 2:00 hian Manipur club Trau leh Indian Arrows ten an khel dawn. Tlai dar 4:30-ah Gokulam Kerala leh Churchill Brothers te an khel leh ang a, zan dar 7:30-ah Rajasthan United leh RoundGlass Punjab te an inkhel ang.
Team 13 an awm avangin round tinah match ruk a awm ang a, team khat an awl zel ang. December 27, chawhnu dar 2:00-ah Neroca leh Sreenidi Deccan te an inkhel dawn. Tlai dar 4:30-ah Mizo club an inlan dawn, Aizawl FC khingpui tur hi Real Kashmir an ni ang. Zan dar 7:30-ah Mohammedan Sporting Club leh Sudeva Delhi FC te an inkhel ang a, round hmasa berah hian Kenre FC an awl ang.
Inelna kalphung
I League inelna kalphung hi season liam ta aṭang khan thlak danglam a ni a, vawi hnih ṭheuh an inkhel kual tawh lo. Vawi khat an inkhelh kual zawhah a sang pasarihin champion tur an zawng ang a, an inkhel kual leh ang. Chutiang bawkin a hnuai lam parukin relegate tur an zawng dawn.
Season liam ta khan Aizawl FC an vanduai a, Covid-19 vangin an ṭhat theih dan berin bul an ṭan lo. Coach Lalsangzuala Hmar-in Covid-19 a kai avangin inelna laklawh laiin tuna coach ni ta Yan Law hian a ho leh a, an khelh ṭhat phu tawk result an nei lo.
Team 11 inelnaah Mizo club hi vawi khat inkhelh kual zawhah pasarihnaah an awm a, an chunga awm team pathum aiin point khat chauhin an hmu tlem. Relegate tur zawnnaah erawh Mizo club an chungnung hle.
Beisei a sang
I League-ah hian foreigner pali a neih theih a, heng zinga pakhat hi Asian an ni tur a ni. Aizawl FC hian season ṭantirhah foreigner pali an nei nghal a, I League-a tawnhriat nei ṭha Willis Deon Plaza, Aser Pierrick Dipanda Dicka leh Bazie Armand te an tel. Tlarhnung ti chak turin Uzbekistan defender Olimjon Karimov a tel bawk.
Aizawl FC coach Yan Law chuan, "Kan squad hi champion pui tham an ni a, foreigner kan neih ṭhat bakah Mizo player ṭha kan kawl. Kan champion theih ka ring a, champion kan tum ang," tiin club thuneituten a player duh ang an laksak thu a sawi. Mizo club khingpui hmasa ber tur hi Real Kashmir an ni a, IFA Shield champion hlim an ni.
Yan Law chuan, "Real Kashmir hian I League hmain inpuahchahna ṭha tak an nei thei a, IFA Shield an khelh hi an hlawkpui dawn. A dawta kan khingpui tur Mohammedan-in Calcutta Football League an khel bawk. Chhuanlam siam kan tum lo a, result ṭha tak kan nei thei ang," tiin Vanglaini a hrilh.
I League khel tur club-te
Aizawl FC Aizawl, Mizoram
Churchill Brothers Margao, Goa
Gokulam Kerala Calicut, Kerala
Indian Arrows Bhubaneswar, Odisha
Kenkre Kolhapur, Maharashtra
Mohammedan Kolkata, West Bengal
Neroca Imphal, Manipur
RoundGlass Punjab Ludhiana, Punjab
Rajasthan United Bhilwara, Rajasthan
Real Kashmir Srinagar, Jammu and Kashmir
Sreenidi Deccan Vishakapatnam, Andhra Pradesh
Sudeva Delhi New Delhi, Delhi
Trau Imphal, Manipur
• Rajasthan United hi 2021 I-League Qualifiers champion an ni.
• Sreenidi Deccan hi inlei tling an ni a, tun season-ah an relegate thei lo.
• AIFF-in rawlthar ṭha rual a dah khawmna Indian Arrows hi an relegate thei lo bawk.
• Season liam taa relegate chu Neroca an ni a, amaherawhchu AIFF-in Covid-19 hri leng vangin Manipur club chungchangah zahngaihna lantirin I League-ah an awm chhunzawm ang.
• Covid-19 vangin kumin I League hi home leh away hmanga khel loin Kolkata-ah khelh a ni ang.
• Team 13 hi vawi khat ṭheuh an inkhel kual ang a, chumi zawh chuan a sang pasarihin Championship stage an khel ang. A hniam parukin Relegation stage an khel thung ang.
Aizawl FC Fixtures
Date Time Opponent
December 27, Thawhṭanni 4:30 PM Real Kashmir
December 30, Ningani 7:30 PM Mohammedan
January 4, Nilaini 2:00 P Rajasthan United
January 9, Pathianni 4:30 PM Punjab Football Club
January 14, Zirtawpni 2:00 PM Sudeva Delhi FC
January 19, Nilaini 2:00 PM Indian Arrows
January 24, Thawhṭanni 7:30 PM Churchill Brothers
January 29, Inrinni 4:30 PM Kenkre FC
February 3, Ningani 4:30 PM Gokulam Kerala
February 8, Thawhlehni 7:30 PM Trau
February 13, Pathianni 2:00 PM Neroca
February 18, Zirtawpni 2:00 PM Sreenidi Deccan