Ranji Trophy khel tur squad an puang

Board of Control for Cricket in India (BCCI) hnuaia state hrang hrang inelna, Men’s Senior Team for Ranji Trophy 2021-2022 khel turin Cricket Association of Mizoram (CAM) chuan squad a puang a, player 20 koh an nih bakah standby-ah mi pasarih an awm.

Inelna hi January thla aṭanga khelh a ni dawn. Mizoram team hian December 27 hian inelna neihna hmun tur Chennai an pan ang. Tun ṭuma kohte hi Ranji Trophy match hmasa pahnih atan a ni.

Tualchhung criket inelna Mahuma Memorial leh Khaled Memorial a awm mek a, Mizoram tana khel tura kohte pawh an inlan. Tun dinhmunah team angin training an la nei lo a, a khat tawkin Durtlang khelmualah an training ṭhin.