Krismas chawlh nei lo Premier League club-te!

"Lal pian hun lawmawm tak kan thleng leh ta, hlim taka lawmin zai i vawr ang..." tiin Biak in lamah kan zai ṭan a, Masi boruak leh a chhehvelin Mizoram pawh min tuam hneh leh ta.

Mizoram chauh a ni lo - khawvel hmun hrang hrangah Lal lo piang tur lawm turin an inpuahchah a, European top league-te pawh mahni in lum ngeia player leh staff ten 'Masi' an hman theih nan an chawl hlawm.

Mahse, European top five league zingah Premier League-in chawlh an nei leh lo bik a, Covid-19 a hluar thar chung pawhin English club-ten chawlh lam an ngaihtuah ve hman lo.

Premier League leh EFL club-te chu Thawhṭanni khan inhmukhawm mah se Covid-19 a hluar chungin inkhelh chhunzawm an thlang a, a bik takin club lian tan chuan lung a zing leh khawp ang.

A manganthlak
Liverpool manager Jurgen Klopp chuan, "Krismas thla kan thlen hma hi chuan a zia mai a, December 26 leh 28-a inkhelh ngaite hi a buaithlak hle. Tih dan ṭhân a nih avangin kan pawm mai a ngai a, mahse, a buaithlak tho a ni.

"Cup inelnaa kan thlen san poh leh kan buai chu a ni mai a, December leh January hi chu a buaithlak a ni. A lawmawm lai erawh keimahni chauh ni loin, club dang pawh an buai ve vek dawn," a ti!

Nizana Leicester City nena League Cup quarterfinal kheltu Liverpool hian ruai ṭheh ni, December 26-ah Leeds United an mikhual dawn a, December 28-ah Foxes an lenchilh ang a, January 2-ah Chelsea an lenchilh zui ang.

Premier League-ah Reds hian match 18 khelin point 41 an hmu mek a, an chungah hian an khelh ang zata point 44 nei City an awm - fixture chep tak kara an khelh dan tur hi en a châkawm tawh hle.

Manchester khua
Liverpool aiin an elpui ber City an hahdam hret - League Cup-ah an tlak tawh avangin nizanah an inlan ve lo a, mahse, Reds ang thoin Krismas leh kumthar vuakvetah match thum tho an khel dawn.

Ruaiṭheh niah City hian Foxes an mikhual ang a, ni hnih an chawl zawk ang a, December 29 zanah Brentford an lenchilh zui leh ang. January 1 zanah Arsenal mualah an leng leh bawk dawn - player tan kumhlui thlah zanah len rei a chi loh ang!

Ralf Rangnick enkawlna hnuaiah Manchester United-in beiseina thar an nei a, League Cup an khelh tawh bik loh avangin an fixture hi a hautak lutuk lo tiin a sawi sak theih.

December 27 zanah Newcastle United an lenchilh ang a, December 30 zanah Burnley mikhualin, January 3 zanah Wolverhampton Wanderers an mikhual dawn bawk - club tenau tia chhal theih vek fixture hautak laiin an tum dawn a, khualmuala zin vawi khat chiah an nei dawn bawk.

London club
Nizan khan League Cup quarterfinal-ah Brentford nen Chelsea an inkhel a, December 26 zanah Steven Gerrard hnuaia insiamṭha mek Aston Villa an lenchilh zui dawn bawk - December 29 zanah Brighton & Hove Albion an mikhual ang a, January 2 zanah Liverpool an mikhual dawn bawk.

Blues hi an league match hnuhnung paliah vawi khat chiah an chak - vawi hnih draw an nei a, vawi khat an tlawm a, an champion beiseina a thamral mek. Villa mualah an inkhelh dawn avangin a awlsam dawn lo a, Reds mikhual pawh an châk lo ang.

Arsenal-in Thawhlehni zan khan League Cup semifinal an lut chiang a, Sunderland chu 5-1 in an sawp. Gunners hi an phur vanglai tak a ni a, Norwich City (December 26) leh Wolves (December 28) an lenchilh tur chu paltlang thei mai tura ngaih an ni.

Mahse, January 1 zanah Manchester City-in an lo hmuak dawn a, Arsenal tan hei tak hi a awlsam lo ang - Gunners hi table-ah palina an ni mek. Engpawhnise, football fan-ten Mas lai pawhin inkhel hmuhnawm en tur kan nei dawn a, Mas chibai vek ule!