Arsenal chakna Eddie Nketiah

Eddie Nketiah-a hattrick hmangin Arsenal chuan League One club Sunderland 5-1 in an sawp a, manager Mikel Arteta naute hian nuamsa takin Carabao Cup semifinal an inhlangkai.

Thawhlehni zan Emirates Stadium-a inkhelah Nketiah-a'n goal thum a khung bakah, forward Nicolas Pepe leh Charlie Patino ten goal khat ve ve an khung ve bawk. Sunderland tana Nathan Broadhead goal kungin awmzia a nei lo.

Laipui a puak
Hripui kaihhnawih vangin Albert Sambi Lokonga, Pablo Mari leh Calum Chambers te an inkhel thei lo sa a, damlohna vangin Ainsley Maitland-Niles chu chhawr theih a ni lo bawk. Match khelh hmabak an la ngah avangin huaisen taka player siksawi a ngai bawk.

Arteta-a'n December thla chhungin match an ngah avangin player a siksawi lui. An match hnuhnunga Leeds United hnehtu pakua ngawt a thlak ṭhawt. Premier League lama a chhawr ṭhinte hahchawlhna hun a pe tihna a ni.

Player naupang leh khel khat deuhte lut mah se goal khung erawh an harsat lo. Minute 17-na aṭangin goal an khung ṭan, English striker Nketiah hian goal pathum hi six-yard box bul bawr vel aṭanga a khung vek a ni.

North London club tana lawmna tur chu Pepe-a khelh dan a ni ang. Pound maktaduai 72 man forward hian goal a khung bakah assist vawi hnih a nei - league lamah pawh khel tlak a nihzia a takin a lantir, kum 18 mi Patino-a'n club tana a match hmasa berah goal a khung bawk.

Arteta a lungawi
Premier League lamah hma an sawn a, inelna dang Carabao Cup lamah pawh a sang pali zingah an tel der tawh. Tun hnaia a naute khelh danah Mikel Arteta a lungawi, kumina match an khelh hmabakah pawh result ṭha a beisei.

Arteta chuan, "Semifinal thlen kha kan thil tum a ni a, kan tihlawhtling thei hi a lawmawm. Player siksawi kual deuh mah ila a tir aṭangin engkim a fuh nghal a. Remchang kan insiam theih hmasa pahniha goal kan khung khan thil a tiawlsam.

"December thla chhungin match kan khel hnem tawh, ruahman dan chuan khelh hmabak pahnih kan la nei. January 1-ah kan khel zui dawn bawk, match ngah ringawt hi chu thil pangngai a ni. Hri a len bawk avangin player inkhel thei kan mamawh tam," tiin a sawi.

Arsenal hian December 26, Pathianni zanah Norwich City an lenchilh zui dawn a, chumi hnuah Wolves an mikhual leh ang. Kum thar lawm nan champion lai Manchester City an mikhual dawn bawk avangin an hmabak a hautak hle.