Kum khar nan Juve an chak

Juventus chuan kumina an match hnuhnung ber atan Cagliari an hmachhawn a, Old Lady hian an mikhual hi 2-0 a hnehin kum an khar. Thlasik chawlh an hmang zui dawn - nakkum January 7-ah an inlan leh chauh ang.

Allianz Stadium-a inkhelah Juve tan Kean-a'n chawlhlawk hmain goal a khung a, hun tawp dawnah Federico Bernardeschi chuan an goal hnihna a khung bawk. Match 60 chhung goal a khung loh hnuah Bernardeschi-a'n goal a khung ve leh ta chiah a ni.

Massimiliano Allegri nauten season bul an ṭan fuh lo a, table lama an dinhmun pawh a hniam hman hle. Mahse, tun hnaiah an insiam ṭha tawh. Inelna hrang hranga an match hnuhnung pangah vawi li an chak, goal khat chiah an chhuah.

Juve manager Allegri chuan, "Ka naute kha hla deuh hlek aṭanga shot tam turin ka fuih a, ka duh ang takin an ti thei kha ka lawm hle. Tunah chuan nakkum kan nghak dawn, January hi thla hautak leh harsa a ni dawn.

"Tun dinhmunah palina Atalanta nena kan inthlauhna hi point li chauh a ni a, hetianga kum kan khar thei hi a lawmawm. Season chanve chauh kan la hmang tih hria ila, season chawhma lam aia ṭha zawkin kum tharah inlan kan tum ang," tiin a sawi.