Barcelona-in player 10 Sevilla an hneh thei lo

Sevilla defender Jules Kounde hnawhchhuah vangin Barcelona-in player tam zawkin khel mah se khualmualah hnehna an chang zo chuang lo a, La Liga-ah Sevilla nen 1-1 in an inhnehtawk.

Mualneitu Sevilla tan Alejandro Gomez chuan minute 32-naah goal hmahruai a khung a, Barcelona-in chawlhlawk hmain Ronald Araujo hmangin an chhang a, goal dang erawh an khung tawh lo.

Sevilla-in table-ah pahnihna dinhmun an luah chhunzawm zel a, hmahruaitu Real Madrid chu khelh zat inangah point ngain an phak lo mek - nizanah Real an inlan avangin he thuziak i chhiar meuh chuan an inthlauhna hi a danglam leh tawh ang.

Barcelona erawh table-ah pasarihna an ni mek a, match 18 an khelh tawh aṭangin point 28 an nei - Xavi hote tan champion tum ai chuan Champions League khelh hram tum chu an beisei tur zawk a ni.

Inkhel chu
Sevilla-in mahni mualah chak loh an duh lo a, minute 32-na lekah Gomez chuan goal hmahruai a khung - Barcelona midfielder hlui Ivan Rakitic-a siamsak hi training ground chhuak a ni tih a hriat.

Mahse, Sevilla-in goal dang an khung belh thei lo a, Barcelona an beidawng duh lo bawk - minute 45-naah Araujo chuan Ousmane Dembele-a siamsak chu goal-ah a chantir a, 1-1 a ni.

Second half-ah pawh goal dang hmuh tur a awm lo a, red card zawk kan hmu. Nipui transfer laia Chelsea nena sawizawm Jules Kounde chuan ball-in Jordi Alba a vawm a, referee-in red card a pe.

Kum 23 mi Koundé hi France tana vawi sarih inlan tawh niin, Chelsea-in an la thlithlai reng nia sawi a ni a, Tottenham Hotspur hming a ri ve leh tawh bawk - mahse, English top flight football meuha hlawhtling tur chuan a nungchang siamṭhat a mamawh tih a lang.

Barca an hriam lo
Minute 64-naah Koundé hnawh-chhuah a ni a, player pakhata tam zawk ni chungin Barcelona an khel - mahse, Catalan club hian a tam zawk nih an chhawr thei chuang lo a, Xavi hnuaiah pawh eng an ang thei lo.

Barca tan rawlthar duhawm Gavi chuan goal khungna chance duhawm nei mah se a chhawr thei lo a, kum 17 mi midfielder vanneih zan a ni tlat lo - Barca-in an ui vawng vawng ang.

Player inhliam ngun ve tak Dembele-a'n hun tawp nan minute ruk chiah a awm tawh tihah chance a nei bawk a, mahse, goal post-in Sevilla a chhan a, Barcelona an vanduai takzet.

Sevilla aṭanga loan-a Barca pantu Luuk de Jong-a'n a club nghet zawk lakah goal tauh luhna remchang a nei bawk a, mahse, Dutch striker hian a hun ṭha neihah Sevilla goalkeeper Bono tana man nuam tawk bakin a tauh thei lo.

A pawi
Barcelona-in kum 2021-a an match hnuhnung berah hnehna an chang zo lo a, Krismas chawlh an hmang zui dawn - January 2, zan dar 1:30-ah Real Mallorca lenchilhin chawlh zawha an match hmasa ber chu an khel ang.

Catalan club boss Xavi chuan, "Ka ngaihdan dik takah chuan point hnih kan hloh a ni. Kan khel ṭha a, hnehna chan kan phu. Ka team hian hma kan sawn zel a, thil tam takah kan insiamṭha tawh a ni," a ti.

Xavi chuan sawi zawmin, "Champions League khel phak huanga awm kan duh a, mahse, vawiin atan chuan a la hun lo a ni mahna. Draw result nei mah ila, ka naute ka chhuang hle," a ti - Barca hi Sevilla lakah chak ngat se palina Rayo Vallecano nen an point hmuh zat inang tur an ni.

Barcelona legend chuan, "Goal hmaah kan vannei tawk lo. Gavi ball tauh te, Dembele post tih perte en ila, kan goal chhuah lah set-piece a kan tihsual vang a ni - kan insiamṭha bawk ang," tiin vanduai vanga chak zo lo an nih thu a sawi.

Mas chawlh!
Krismas boruakin min tuam ṭan a, La Liga lam pawhin Krismas lai chuan inkhel an nei dawn lo a, chawlh an hmang dawn - nizan khan inkhel pahnih a la awm a, result erawh kan hre hman lo.

Granada-in Atletico Madrid an mikhual a, zing lam dar 2:00 khan Athletic Bilbao leh Real Madrid an inkhel bawk - he thuziak i chhiar meuh chuan table-a team inthlauhna pawh a danglam leh tawh ang.

Spanish club-ten La Liga chawlh an hman hnuah match hmasa ber chu kumhlui thlah zan, December 31-ah khelh ṭan leh a ni ang a, Valencia-in zan dar 8:45-ah Espanyol an mikhual dawn.

Kum tharah hian Mizo ngaihven club zingah Real Madrid, Atletico Madrid leh Barcelona chu January 2 zanah vek an inlan ang.

Inkhel Result
Sevilla 1 - 1 Barcelona
SEV: Alejandro Gómez 32'
BAR: Ronald Araújo 45'

Villarreal 5 - 2 Alavés
VIL: Gerard Moreno 18', 88'; Boulaye Dia 27', 76'; Yeremi Pino 79'
ALA: Pere Pons 44'; Joselu 65'

December 31, Zirtawpni Zan
Valencia 08:45 PM Espanyol

January 2, Pathianni Zan
Getafe 06:30 PM Real Madrid
Atletico Madrid 08:45 PM Rayo Vallecano
Elche 08:45 PM Granada
Alaves 11:00 PM Real Sociedad
Real Betis 11:00 PM Celta Vigo
Real Mallorca 01:30 AM Barcelona

January 3, Thawhṭanni Zan
Villarreal 11:30 PM Levante
Osasuna 01:30 AM Athletic Bilbao
Cadiz 01:45 AM Sevilla