Suns lakah Lakers an chak lo

Los Angeles Lakers an chak hleithei lo. LeBron James leh a ṭhiante hi tun hnaiah a zawnin vawi thum an tlawm ta. Nimin zing khan Lakers hi Phoenix Suns lakah 108-90 in an chak lo a ni.

Suns hian match 26 aṭangin ṭum 24 zet hnehna an chang thei a, malpui hliam dam hlim Devin Booker chuan point 25 rawn nei leh nghalin an chak theih nan a thawh hlawk hle. Tun hnaiah a zawna vawi li chak tawhin Western Conference-ah hmahruaitu an ni chhunzawm.

Hripui lengin NBA a tibuai mek a, hri leng vanga buai zingah Lakers pawh an tel. Coronavirus kaihnawih vangin head coach Frank Vogel bakah player Kent Bazemore, Malik Monk, Avery Bradley leh Austin Reaves te an chhawr thei lo.

Team hrang hrangin buaina tawk mah se Krismas vuakvetah NBA an kaltlangpui dawn. NBA commissioner Adam Silver chuan, "Tunlai boruak awm dan thlir chuan buaina lian zawk hmachhawn thei pawh kan ni dawn niin a lang.

"Mahse, hri leng hian eng chena rei nge min chamchilh dawn a hriat theih si loh. Chuvangin a theih leh remchan dan ang anga inelna kan kalpui a ngai, natna hrik hi um bo a nih mai hmel si loh a, kan chenpui thiam a ngai," tiin a sawi.

NBA Results
Indiana Pacers 96 - 125 Miami Heat
Detroit Pistons 91 - 105 New Rork Knicks
Portland Trail Blazers 97 - 111 New Orleans Pelicans
Minnesota Timberwolves 102 - 114 Dallas Mavericks
Phoenix Suns 108 - 90 Los Angeles Lakers