Ferrando hoin Bagan an chak nghal
ATK Mohun Bagan-in an coach thar Juan Ferrando hnuaia an match hmasa berah hnehna an chang nghal a, NorthEast United chu 3-2 in an hneh.
Highlander tan Suhair Vadakke-peedika chuan minute hnihna lekah goal hmahruai khung mah se Liston Colaco leh Hugo Boumous (goal hnih) hmangin Bagan-in an chhanglet a, NorthEast tana Mashoor Shereef-a chhanletnain awmzia a nei phak lo.
Beiseina
Bagan-in coach Antonio López Habas an ban hnuah Juan Ferrando chu Goa aṭangin an thlem lut a, Spanish coach lalut tur hian a manah vaibelchhe khat lai an inseng hial - an beisei a sang hle.
Mahse, Highlander lakah erawh duhthusamin bul an ṭan thei bik lo a, minute hnihna lekah Suhair VP chuan Amrinder Singh-a man phak lohin a tauh goal a, Highlander-in hma an hruai der.
Hei le Bagan
Rin loh takin NorthEast lamin goal an rawn khung a, Bagan an che ve nghal vat - Manvir Singh, Roy Krishna leh Liston Colaco ten chance duhawm an nei vek a, mahse, NorthEast keeper Mirshad Michu a chesual lawk lo.
First half a tawp dawn hnai a, Michu a ding khawng reng thei bik lo. Hun pek belh minute hnihnaah Krishna ball siamsak chu Colaco chuan a tauh lut a, chawlhlawk an hman meuh chuan 1-1 a ni der.
Mapuia a pui lo!
NorthEast United coach Khalid Jamil-a'n chak loh a duh lo a, second half-ah Rochharzela leh Provat Lakra a la chhuak a, 'Sialhawk Express' R. Laldanmawia leh Joe Zoherliana te a luhtir.
Danmawia leh Joe-a luh hnu lawkah Lalkhawpuimawia'n chance duhawm lutuk a nei a, mahse, Kelkang tlangval hian a hun neih a tauh lut lo. Mapuia bawk a chesual nawn - Zoherliana'n goal khung theihna duhawm tak a siamsak leh a, a chance a chhawr lo.
Bagan bawk
Mapuia'n Highlander tana hming chherna remchang a neih a chhawr thei lo a, Bagan-in NorthEast an hrem let. Minute 53-naah Highlander tlarhnung tih ṭhat tawk loh zarzoin Kolkata club tan Boumous chuan hmahruaina goal a rawn khung a, Jamil leh a naute an hawihai.
Bagan tan Manvir leh Colaco ten chance nei zui leh mah se Michu an paltlang thei lo a, Boumous lakah bawk a chhuah nawn thung - French-Moroccan attacking midfielder hian Euro 2020-a Finland tana inlan Joni Kauko-a siamsak chu goal-ah a chantir.
A pawi zo ta
Highlander-in hma taka goal an khung hnuah an chance neih dang an chhawr lo a, goal thum an chhuah zui bawk - hun tawp nan minute thum chauh a awm tawh tihah Mashoor chuan rawn khung ve leh mah se awmzia a nei lo a, 3-2 in an tlawm.
ISL-a Indian coach hmasa ber Khalid Jamil chuan, "Kan chance neih kan chhawr loh avanga tlawm kan ni lo a, kan khel ṭha tawk lo hrim hrim - chuvanga tlawm chu kan ni a, thil dang a ni lo," tiin a sawi.
December 22, Nilaini Zan
NorthEast United 2 - 3 ATK Mohun Bagan
NEU: Suhair Vadakkepeedika 2'; Mashoor Shereef 87'
AMB: Liston Colaco 45+3'; Hugo Boumous 53'; 76'
Zanin Inkhel Tur
Hyderabad 7:30 PM East Bengal
December 22, Zirtawpni Zan
Odisha FC 7:30 PM FC Goa
December 26, Pathianni Zan
Kerala Blasters 7:30 PM Jamshedpur
December 27, Thawhṭanni Zan
NorthEast United 7:30 PM Mumbai City
December 28, Thawhlehni Zan
Hyderabad 7:30 PM Odisha
December 29, Nilaini Zan
ATK Mohun Bagan 7:30 PM Goa
December 30, Ningani Zan
Chennaiyin 7:30 PM Bengaluru
January 02, Pathianni Zan
Kerala Blasters 7:30 PM FC Goa
Jamshedpur 9:30 PM Chennaiyin
January 03, Thawhṭanni Zan
Odisha 7:30 PM Mumbai City
January 04, Thawhlehni Zan
Bengaluru 7:30 PM East Bengal