AFCON kaltlangpui dawn

Confederation of African Football (CAF) president Patrice Motsepe chuan, hripui leng vangin khawvel buai mek mah se ruahman lawk angin Africa Cup of Nations chu an kaltlangpui tur thu a sawi chhuak.

January 9 aṭangin Olembe Stadium, Cameroon-ah inelna hi neih ṭan tur a ni. Ruahman lawk dan chuan February 6 thleng khelh a ni dawn a, Africa khawmualpuia football thiam ram hrang hrangte an inel ang.

Motsepe-a chuan, "January 7 aṭangin inkhel ṭan a ni ang, inelna hi Cameroon-ah kei leh ka nupui bakah ka fate nen kan en ang. Inelna thlengtu tur leh inkhel tur ramten theihtawp an chhuah a, kan beisei anga khelhchhuah theih ngei kan inring.

"African football mai bakah Africa ram mipuite tan a pawimawh em em a, chuvangin eng ang taka inlungrual leh ṭha nge kan nih chu khawvel hmuhah kan tarlang dawn," tiin a sawi.

Cameroon FA president atana thlan thar Samuel Eto'o pawhin AFCON chungchang sawiin, "Hripui len laiin Euro chu khelmuala entu awm chungin khelh a ni a, buaina a awm hran lo. Chuvangin eng vangin nge Cameroon hian AFCON kan thlen theih loh bik ang?

"African mite hian thil ropui tak kan ti ve thei a ni tih hi a takin kan lantir tur a ni ang. Cameroon FA chuan inelna a hlawhtlin theih nan a tawp thlengin theihtawp kan chhuah ang," tiin a sawi ve bawk.

AFCON khelh tur hian sawisel a hlawh a, a bik takin European league lian ho khelh laklawh lai nen a hun a inrual avangin sawiseltu an awm nual. Mahse, Africa khawmualpui lam chuan an kalphung pangngai hi thlak tumna an nei hran lo.

Premier League club zingah AFCON lama an player zin chhuak tur an awm nual. Liverpool chuan Mohamed Salah, Sadio Mane leh Naby Keita te an chân dawn a, an hmunruak hnawh khah a harsa ang.